Drejtoria Rajonale e Trashëgimisë Kulturore në Gjirokastër ka nisur ndërhyrjet restauruese në tre manastire të qarkut.
Punimet kanë nisur në Manastirin e Dervicianit dhe në Manastirin e Dhuvjanit, monument kulture i kategorisë së parë, ku krahas restaurimit po punohet edhe për ngritjen e trapezarisë, për të vijuar më pas edhe në Manastirin e Mingulit.
“Në vijim të planit të investimeve dhe programit të parashikuar nga qeveria shqiptare dhe nga donatorët, ka filluar ndërhyrja në manastirin e Derviçanit është duke përfunduar ndërhyrja në manastirin e Duvjanit monument kulture i kategorisë së parë ku në bashkëpunim me World Monument Found është kryer dhe një investim për ngritjen e tapezarisë. Gjithashtu po vazhdon restaurimi i Teqesë së Koshtanit. Jemi në fazën finale të kësaj ndërhyrje si dhe po përgatitet fillimi i ndërhyrjes në manastirin e Mingul në bashkëpunim me Organizatën Trashëgimi Kulturore pa Kufij”, tha Ardis Duka, drejtor i drejtorisë rajonale të trashëgimisë kulturore.
Në këto objekte, ndërhyrjet synojnë ruajtjen dhe konsolidimin e strukturave, si dhe mbrojtjen e vlerave dhe identitetit të tyre kulturor e historik.
“Ndërhyrje po kryhet në manastirin e Derviçanit, po kryhet ngritja e konakëve në faqen veriore të tyre. Ndërkohë Manastiri i Mingulit, po ashtu një objekt shumë i rëndësishëm i kategorisë së parë në zonën e Lunxhërisë në bashkinë Gjirokastër. Po përgatitet fillimi i restaurimit total të këtij objekti duke përfshirë të gjitha ndërhyrjet, konservimin dhe restaurimin e fasadave, çatisë edhe elementët e tjerë përbërës të këtij objekti”, shtoi Duka.
Ndërhyrjet restauruese synojnë të garantojnë ruajtjen e këtyre monumenteve të trashëgimisë kulturore, duke i mbrojtur nga degradimi dhe duke siguruar vijimësinë e tyre për brezat e ardhshëm.
