Mot me reshje shiu dhe temperatura të larta do të mbizotërojë këtë javë në Kosovë.
Instituti Hidrometeorologjik i Kosovës në një njoftim për shtyp bën të ditur se të hënën dhe të martën i gjithë vendi do të jetë nën ndikimin e masave të ajrit me presion të ulët atmosferik.
“Si pasojë e depërtimit të këtyre masave të ajrit do të krijohen kushte për formimin e vranësirave të dendura dhe jo të qëndrueshme. Këto vranësira do të shoqërohen me reshje intensive shiu”, thuhet në njoftim.
Nga IHMK bëjnë të ditur se temperaturat minimale në këto dy ditë do të lëvizin ndërmjet 11-13 gradë Celcius, kurse maksimalet e ditës do të lëvizin ndërmjet 19-22 gradë Celcius.
Nga dita e mërkurë e më tej pritet një stabilizim i motit. Shtypja atmosferike do të ngrihet mbi vlerat e normales. Temperaturat minimale do të lëvizin ndërmjet 13-15 gradë Celcius, kurse maksimalet e ditës pritet të shënojnë vlera mbi 30 gradë Celcius. Do të fryjë erë e lehtë deri mesatare nga drejtimi i jugperëndimit. / k.p
