“AFP” i ka kushtuar një shkrim marrëdhënies së futbollistëve serbë në Shqipëri, ku duket se tensionet politike nuk kanë asnjë lidhje me fushën e futbollit. Për ta ilustruar këtë gjë ka marrë opinionet e mesfushorit të Kukësit, Luka Milunoviç, dhe të mbrojtësit të Laçit, Aleksandar Ignjatoviç.
Mosbesimi midis Kosovës, me shumicën e saj shqiptare dhe myslimane dhe Serbisë, një komb kryesisht ortodoks, është larg mendimeve të Milanoviç në fushë”, citohet nga “AFP”.
Atij i është bërë një “mirëseardhje e ngrohtë” që kur mbërriti katër muaj më parë për të luajtur profesionalisht në Shqipëri për Kukësin, një ekip i Kategorisë së Parë që vjen nga një rajon malor në kufi me Kosovën.
“Unë jam këtu për dashurinë e futbollit”, tha Luka për “AFP”. Për të, konkurrimi në Shqipëri është një vazhdim i natyrshëm i një karriere që e ka parë të luajë për Yllin e Kuq dhe OFK Beograd në Serbi, së bashku me qëndrimet në Belgjikë, Malajzi, Greqi dhe Hungari: “Gjuha e futbollit”. “Për lojtarët dhe tifozët, Luka është njëri prej nesh”, tha Erjon Allaraj, zëdhënësi i klubit.
“Ne flasim gjuhë të ndryshme, por të gjithë e dimë gjuhën e futbollit”, shtoi kapiteni i Kukësit, Gjelberim Taipi, një shqiptar nga qyteti jugor serb i Bujanocit. Për lindjen e fëmijës së parë të Milanoviç në dhjetor, i gjithë ekipi iu bashkua atij për të festuar. Përvoja e tij është larg përjashtimit.
“Tani, kur shikojnë në ‘Instagram’ jetën time në Shqipëri, shumë më thonë se duan të vijnë të më vizitojnë”, tha Ignjatovic për “AFP”. Me një sy drejt daljes në pension, Ignjatoviç thotë se shpreson të përdorë përvojat e tij në Shqipëri për të zhvilluar një karrierë pas futbollit.
“Po mendoj të hap një agjenci turistike që do të më lejojë të punoj në Shqipëri dhe Serbi. Tani i njoh të gjitha vendet e bukura në Shqipëri”, thotë ai, me shpresën për të fituar para nga industria turistike në rritje e Serbisë.
Ignjatoviç gjithashtu krenohet që ka shumë miq shqiptarë dhe tallet me paragjykimet etnike që kanë ndarë prej kohësh shumë komunitete në rajon.
“Futbolli na lejon t’i forcojmë lidhjet tona. Futbolli dhe politika janë dy botë krejtësisht të ndryshme”, thotë Ignjatoviç, i cili prej tri vitesh jeton në Tiranë me gruan e tij Mila dhe vajzën e tij tremuajshe Iskra.
