Prokurorët publikë në Peru kanë nisur një hetim të gjerë ndaj një rrjeti të dyshuar trafikimi të qenieve njerëzore, i cili rekrutonte qytetarë përmes mediave sociale me oferta mashtruese për punë të paguara mirë në Rusi.
Sipas deklaratës së Prokurorisë së Përgjithshme, individë të ndryshëm, përfshirë ish-ushtarakë dhe oficerë policie, u mashtruan me kontrata të rreme si agjentë sigurie dhe vende të tjera pune. Pasi mbërrinin në Rusi, viktimat detyroheshin të merrnin pjesë në operacione luftarake në konfliktin e armatosur mes Rusisë dhe Ukrainës.
Hetimi është hapur për krime të dyshuara të “trafikimit të qenieve njerëzore” dhe “trafikimit të rënduar të qenieve njerëzore”.
Zyra e prokurorit ka theksuar se hetimet kishin nisur prej më shumë se një viti, duke përdorur metoda speciale, dhe kulmuan me ekzekutimin e masave konkrete.
Avokati i familjeve të viktimave, Percy Salinas, ka deklaruar se trembëdhjetë peruanë kanë humbur jetën në luftë.
Ai shtoi se pagat e premtuara, që varionin nga 2,000 deri në 3,000 dollarë në muaj, kishin joshur rreth 600 peruanë të udhëtonin drejt Rusisë që nga tetori.
Ministria e Jashtme e Perusë ka kërkuar informacion nga ambasada ruse mbi vendndodhjen e shtetasve që kishin vendosur të ofronin shërbime në forcat e armatosura të Rusisë. Në një deklaratë të lëshuar të enjten, ambasada e Moskës në Lima pranoi se peruanët kishin nënshkruar kontrata për t’u bashkuar me ushtrinë ruse, por theksoi se kjo ishte bërë “vullnetarisht dhe ligjërisht”.
