Dy vajza dhe tre djem kanë përfunduar në pranga e Policisë pasi akuzohen për trafikimi të qenieve njerëzore dhe shfrytëzim prostitucioni. Policia ka arrestuar këta pesë persona në Morinë në momentin që po tentonin të kalonin kufirin.
Të arrestuarit, I. Qama, 23 vjeçe, A. Qama, 25 vjeçe, Ledian Gjoni, 28 vjeç, Ardit Shmilli, 24 vjeç dhe Zamir Hodo po tentonin të kalonin kufirin bashkë me dy vajzat M. TH., dhe A.P.., të cilat kishin si qëllim t’i trafikonin si prostituta në Gjermani.
Pasi i kishin shfrytëzuar si prostituta në Shqipëri, grupi i kishte pajisur vajzat me karta identiteti rumune false me qëllim dërgimin e tyre në Gjermani, ku do t’i priste një shtetase nga Rumania.
Policia sekuestroi në cilësinë e provës materiale: dy karta identiteti Rumune të dyshuara të falsifikuara, 4 bileta avioni, 7 telefona, 1500 € si dhe një automjet “Taxi”, i cili bënte transportin.
Këta shtetas dyshohen se në bashkëpunim me njëri-tjetrin kanë organizuar veprimtari kriminale të tendencës së shfrytëzimit të prostitucionit në Shqipëri si dhe kanë rekrutuar me qëllim trafikimi e më pas shfrytëzimin për prostitucion si dhe dërgimin e tyre drejt Gjermanisë të dy shtetaseve M. TH., dhe A.P..morine
Gjithashtu do të hetohen në gjendje të lirë për shtetaset M. Th. dhe A. P. të cilat janë rekrutuar nga personat e mësipërm dhe dyshohet se kanë ushtruar prostitucion në Shqipëri dhe me pas do të shfrytëzoheshin jashtë vendit.
Po kështu e përfshirë me trafikimin e vajzave dyshohet të jetë dhe shtetasja Rumune me inicialet P. C., e cila dyshohet se ishte personi pritës në Gjermani.
Të arrestuarit u kapën në flagrancë në momentin kur po tentonin të kalonin pikën e kalimit kufitar Morinë, pasi ishin ndjekur dhe mbajtur nën vëzhgim që nga Tirana, shkruan panorama.
Të arrestuarit e operacionit “Rekrutimi”:
- I. Qama, 23 vjeçe, banues në Tiranë, për veprën penale “Trafikimi i personave, kryer në bashkëpunim”
- Ledian Gjoni, 28 vjeç, banues në Skrapar, për veprat penale “Trafikimi i personave”, “Shfrytëzimit të prostitucionit” dhe “Fallsifikim të letër njoftimeve, stampave ose vizave”.
- Ardit Shmilli, 24 vjeç, banues në Poliçan, për veprën penale “Trafikimi i personave, kryer në bashkëpunim”.
- Zamir Hodo, 31 vjeç, banues në Tiranë, për veprën penale “Trafikimi i personave, kryer në bashkëpunim”
- A. Qama, 25 vjeçe, banuese në Tiranë, për veprën penale të “Shfrytëzimit të prostitucionit”.
