Rekordi i ri, në muajin korrik u larguan 7 mijë shqiptarë për në Gjermani
Policia gjermane është alarmuar për dyndjen e kërkesave të azilkërkuesve nga Shqipëria. Gazeta gjermane “Frankfurter Allgemeine Zeitung” shkruan se për muajin korrik, numri i shqiptarëve që kërkuan azil në Gjermani arriti në 7 mijë.
Sipas gazetës gjermane që u referohet burimeve nga Zyra Federale Gjermane për Migracionin dhe Refugjatët, në korrik u regjistruan 1160 kërkesa për azil më shumë se në qershor. Kjo shifër është gati dhjetëfishuar në krahasim me korrikun e 2014-s, kur autoritetet gjermane regjistruan vetëm 766 kërkesa për azil nga shqiptarët. Megjithatë Zyra Federale Gjermane për Migracionin dhe Refugjatët (BAMF) ende nuk i ka bërë zyrtarisht publike shifrat e azilkërkuesve nga vende të ndryshme të botës për muajin korrik.
Zëdhënësi i grupit të punës së deputetëve socialdemokratë gjermanë për Migracionin dhe Integrimin, Rüdiger Veit, shprehu bindjen se Shqipëria, Kosova dhe Mali i Zi shumë shpejt do të kategorizohen si vende të sigurta origjine, pavarësisht se azilkërkuesit nga Ballkani Perëndimor, përbëjnë gjysmën e totalit të azilkërkuesve nga e gjithë bota në Gjermani.
Kjo masë nënkupton se kërkesat për azil nga këto vende do të refuzohen dhe azilkërkuesit nga Ballkani Perëndimor do të kthehen në vendet e tyre të origjinës. Sipas rregullave të reja, ata rrezikojnë të përjashtohen nga lëvizja e lirë në zonën Shengen për 5 vite. Duke u ndalur te shifrat, në qershor, Shqipëria u rendit e treta pas Sirisë e Kosovës, për numrin e azilkërkuesve në Gjermani për gjysmën e parë të këtij viti me rreth 22 mijë azil kërkues. Nga rreth 180 mijë kërkesat për azil që u janë paraqitur autoriteteve gjermane për këtë vit, 90 mijë janë prej shtetasve nga Ballkani Perëndimor.
