“Gazzetta dello Sport” ka zbuluar një prapaskenë interesante mbi Paulo Dybala, i cili e rifitoi pozicionin e titullarit dhe të paprekshmit te Juve pas një sezoni të kaluar disi negativ dhe një vere mjaft të turbullt, kur bëri edhe valixhet gati për t’u larguar nga Torino. Siç rrëfen Paolo Condò, në fakt, pothuajse ishte mbyllur gjithçka, argjentinasi ishte bërë gati për transferimin e tij te Tottenham. Përveç paketimit të plaçkave personale, “Joya” kishte regjistruar edhe një video përshëndetjeje (lamtumire) për tifozët bardhezinj.
“Dybala erdhi (në “Sky Sport”) për të regjistruar një mesazh trishtues të lamtumirës për tifozët e Juventusit. Ai ishte spostuar në planet e bardhezinjve nga vendosmëria e Gonzalo Higuain për të qëndruar në klub. Juventusi e kishte propozuar atë në merkato, duke tërhequr interesin e menjëhershëm të Manchester United dhe Tottenham. Shumë i prekur nga ideja e largimit, jo rastësisht vendosi të mos qëndronte në Itali asokohe.
Argjentinasi më në fund ishte tunduar në favor të klubit londinez, ndaj për lamtumirën bardhezi kishte përgatitur edhe videon në fjalë. Gjërat ndryshuan në momentin e mbylljes së marrëveshjes mes palëve. Nga kjo histori, Dybala doli i tjetërsuar, ose më saktë u forcua si personazh i “puzzle” të kampionëve italianë. Në vend që të dorëzohej para karizmës së portugezit Ronaldo, ai u përpoq të jetonte me të, duke dhënë më të mirën e tij dhe mos u dorëzuar”, – sqaron Paolo Condò./telesport
g.kosovari
