Regjistrimet e bizneseve të reja në Shqipëri u rritën me 7.5% gjatë gjashtëmujorit të parë të vitit 2026, sipas të dhënave të publikuara nga Qendra Kombëtare e Biznesit. Në periudhën janar-qershor u regjistruan 11,567 subjekte të reja, ose 806 më shumë se në të njëjtën periudhë të një viti më parë.
Pjesën më të madhe të regjistrimeve e përbëjnë personat fizikë me 8,757 subjekte, ndërsa shoqëritë me përgjegjësi të kufizuar renditen të dytat me 2,775 regjistrime. Bizneset me kapital tërësisht shqiptar mbeten mbizotëruese, por vihet re një rritje e ndjeshme, me 35.7%, e subjekteve me kapital 100% të huaj, të cilat arritën në 1,240.
Qarku i Tiranës kryeson për nga numri i regjistrimeve me mbi gjysmën e totalit, i ndjekur nga Vlora dhe Durrësi, ndërsa rritje janë evidentuar edhe në disa qarqe të veriut të vendit.
Sektori i tregtisë mbetet fusha më e preferuar për hapjen e bizneseve të reja, ndërsa ritme te mira kanë shënuar edhe pasuritë e paluajtshme dhe transporti.
Gjatë së njëjtës periudhë u regjistruan 897 licenca dhe 124 leje, ndërsa në Regjistrin e Pronarëve Përfitues u regjistruan 2,813 subjekte, ose 7.1% më shumë se një vit më parë.
