Me një fond prej 208 milionë lekë të vjetra, qeveria do të ngrejë një database për pronat shtetërore dhe zonat ekonomike në Shqipëri. Ministria e Ekonomisë ka vendosur të administrojë në mënyrë elektronike të dhënat mbi pronat shtetërore ku bëjnë pjesë: informacioni për pronat shtetërore, informacioni për zonat e teknologjisë dhe zhvillimit ekonomik (ZTZHE), database për pronat shtetërore, informatizimi i proceseve dhe shërbimeve që ofron Drejtoria e Përgjithshme e Pronës Shtetërore në MZHETTS si dhe të dhëna të tjera për pronat shtetërore.
Kjo ministri ka hapur një tender në Agjencinë e Prokurimit Publik, ku janë ftuar operatorët të marrin pjesë. Sipas saj, për këtë qëllim është e nevojshme krijimi i një sistemi informatik softëare për pronat shtetërore me kosto mirëmbajtje optimale për administrimin elektronik të informacionit për pronat, zonat ekonomike (ZTZHE), operatorët, investimet, projektet në pronat shtetërore, aktivitetet, qiratë e pronave shtetërore, proceset, procedurat, monitorimin, raportimin, gjurmimin, dokumentet, ndjekjen e veprimeve, vlerësimin etj në lidhje me pronat shtetërore dhe shërbimet që ofron Drejtoria e Përgjithshme e Pronës Shtetërore (DPPSH).
Sipas dokumenteve të gazetës “Shqip” administrimi dhe raportimi i të dhënave për pronat shtetërore, për pronat në procedurë privatizimi, për objektet e dhëna me qira dhe ZTZHE, për projektet e investimeve, për funksionimin e objekteve te dhëna me qira dhe administrimin e informacionit për ZTZHE apo çdo informacion tjetër për pronat shtetërore dhe ZTZHE bëhet sipas disa formularëve përkatës. Aktualisht nuk ekziston një sistem elektronik dhe të dhënat për pronat shtetërore dhe ZTZHE nuk ruhen në mënyrë elektronike në një sistem informatik me database.
Objektivat
- Procesi i administrimit të objekteve shtetërore që do të privatizohen
- Procesi i administrimit të objekteve shtetërore të dhëna me qira ku përfshihen edhe kontratat qe duhet të monitorohen nga MZHETTS
- Procesi i administrimit të Shoqërive Shtetërore (me kapital shtetëror 100% dhe mbi 50%), përfshirë të dhënat administrative, financiare të aseteve dhe të burimeve njerëzore.
- Procesi i administrimit të Shoqërive në likuidim
- Procesi i administrimit të Zonave Teknologjike të Zhvillimit Ekonomik.
Nëpërmjet realizimit të këtij projekti, duhet të arrihen:
- Krijimi i një baze të dhënash me informacion të përgjithshëm për të gjitha asetet e listuara më sipër
- Manaxhimi dhe administrimi efikas i kësaj baze të dhënash nëpërmjet një aplikacioni web të aksesueshëm nga stafi i DPSHSH të MZHETTS.
- Publikimi i të gjithë aseteve që janë në procedure privatizimi, objekteve me qira dhe ZTZHE në portalin pronatshteterore.gov.al.
- Monitorimin e objekteve të dhëna me qira dhe ZTZHE.
