Porti i Shëngjinit është në qendër të vëmendjes për angazhimin e tij në menaxhimin e ardhjes së emigrantëve nga Italia, përmes një bashkëpunimi të ngushtë me autoritetet italiane. Drejtori i Portit, Sandër Marashi, shpjegon sfidat dhe masat që janë marrë për të pritur emigrantët në mënyrë të organizuar dhe të sigurt.
“Në Portin e Shëngjinit prej kohësh është i angazhuar në mënyrë të fuqishme në këtë drejtim,” thotë ai, “për shkak se është një operacion që kërkon vigjilencë dhe resurse të mjaftueshme.” Puna intensive ka përfshirë jo vetëm rritjen e masave të sigurisë, por edhe një koordinim të detajuar me palën italiane për të siguruar që anijet mund të ankorohen pa probleme apo shqetësime.
Drejtori nënvizon se fluksi i emigrantëve nuk është i përditshëm për shkak të procedurave të gjata të transportit detar. “Gjithsesi, edhe në rast të një volumi më të madh të ardhjeve, ne jemi gati për t’i pritur dhe për t’iu siguruar shërbimet e nevojshme,” konfirmon ai.
Porti ka marrë përsipër vetëm pjesën e menaxhimit nga kalata deri te hyrja e qendrës së pritjes së emigrantëve. Edhe pse operacionet brenda qendrës nuk janë në kompetencën e tyre të drejtpërdrejtë, Marashi është i bindur se bashkëpunimi dhe koordinimi janë çelës për të siguruar që ky proces të jetë sa më efikas, shkruan A2.
Sipas Marashit, procedura e hyrjes për anijet mbetet e pandryshuar, duke respektuar të njëjtat standarde të lundrimit për të gjitha mjetet. Ky operacion kërkon një disiplinë strikte dhe ndjekjen e protokolleve për të siguruar që çdo detaj të menaxhohet me kujdes maksimal.
Në përfundim, drejtori Marashi shprehet optimist për kapacitetin e portit për të përballuar sfidat dhe për të ofruar një mikpritje njerëzore, thellësisht të përkushtuar për mirëqenien e emigrantëve që mbërrijnë në brigjet tona.
/a.r
