Duket se është vetëm çështje orësh. Tashmë duket se shumë shpejt refugjatët nga lidnja e mesme si Siria, Iraku etj., do të trokasin në dyert e kufijve shqiptarë. Këtë duket se e dëshmon edhe vizita nesër në Tiranë e Komisionerit të BE-së për Migrim, Çështje të Brendshme dhe Shtetësi, Dimitris Avramopoulos, i cili duket se do të ketë një seri takimesh intensive me drejtuesit më të lartë të shtetit shqiptar.
Që në orët e para të mëngjesit kryekomisioneri për migrimin do të zhvillojë një takim me Presidentin e Republikës, Bujar Nishani. Menjëherë pas takimit me kreun e shtetit shqiptarë Avramopoulos do të pritet nga Ministri i Jashtëm Ditmir Bushati, në selinë e Ministrisë së Punëve të Jashtme.
Ende nuk janë dhënë detaje lidhur me këtë vizitë të kryekomisionerit të BE-së për migrimin, por duke pasur parasysh situatën me refugjatët përreth kufirit shqiptarë me atë grek dhe maqedonas, çështja e tyre duket se do të jetë në qendër të këtyre bisedimeve. Pozicionimi i qeverisë shqiptare deri në këto momente ka qenë se nuk do të hapë kufijtë për refugjatët nga Lindja e Mesme, me arësyetimin se Shqipëria nuk ka as kapacitet dhe as infrastrukturën e duhur për të përballuar këtë fluks. Nga ana tjetër zyrtarë të BE-së kanë kërkuar që qeveria shqiptare të jetë më fleksibël ndaj çështjes që ka të bëjë me refugjatët.