Analisti dhe pedagogu Ervis Iljazaj është shprehur se Reformën në Drejtësi e ka bërë SHBA dhe kjo kryeministri Edi Rama.
Komentet Iljazaj i bëri në emisionin ‘Debat’ me gazetaren Alba Alishani në A2 CNN, ku tha se Reforma në Drejtësi është strategji e politikës së jashtme të SHBA-ve në Ballkan, për të luftuar korrupsionin, për të vendosur demokracinë dhe për të rritur sigurinë.
Ai tha gjithashtu se institucione të ngjashme me SPAK në Shqipëri ka edhe në vende të tjera të rajonit, si në Rumani, Malin e Zi, Kroaci e Maqedoninë e Veriut.
Sipas analistit, kryeministri Rama nuk është një person aq mazokist sa të krijonte një institucion si SPAK, që do të hetonte edhe vetë atë.
“Ka një arsye shumë të thjeshtë pse SPAK është më i besueshëm, sepse kondiserohet institucioni më i pavarur dhe ka mbështetje ndërkombëtare. Aty ku janë investuar më shumë ndërkombëtarët është SPAK. SPAK apo reformat në drejtësi janë politikë e jashtme e SHBA në rajon në dy dekadat e fundit. Këtë nuk e thotë njeri.
Nëse SPAK në Shqipëri e ka bërë Rama, atëherë e ka bërë Rama edhe në Rumani, edhe në Kroaci, edhe në RMV edhe në Malin e Zi. Ore si ka mundësi që në të gjithë rajonin e Ballkanit ka reforma në drejtësi dhe ka SPAK në thonjëza. Reforma në Drejtësi është doktrinë e politikës së jashtme në Ballkan e SHBA-ve për të luftuar korrupsionin dhe për të vendosur demokraci.
Në një rajon ku korrupsioni ka qenë i lartë dhe politikanët shpesh ishin bërë të pamenaxhueshëm për politikën e jashtme amerikane dhe europiane, sepse niveli i korrupsionit ishte shumë i lartë. Madje është bërë edhe për arsye sigurie Reforma në Drejtësi. Nëse ne nuk e kuptojmë këtë gjë dhe themi se doli një politikan shqiptar që të jetë kaq mazokist sa të krijojë një reformë dhe një institucion që të hetojë atë vetë, atëherë nuk jemi aty ku duhet”, tha Iljazaj, shkruan A2 CNN.
