Kryeministri Edi Rama në aktivitetin “Për ty natyrë”, këtë të premte, 5 dhjetor, që ka në fokus mjedisin dhe zhvillimin e qëndrueshëm.
“Mënyra se si shihen, trajtohen dhe promovohen zonat e mbrojtura është një pjesë strategjike e gjithë këtij kompleksi që lidhet me natyrën që na rrethon. Duke kthyer kokën pas, padyshim ka shumë arsye për të qenë krenarë se ku jemi sot. Një dekadë më parë na u desh të bënim dy ndërhyrje shumë radikale për të siguruar marrjen e një kthese sepse gjuetia dhe prerja e pyjeve e paligjshme ishin bërë plagë reale”, u shpreh kreu i qeverisë shqiptare, duke theksuar se sot ka një përmirësim të jashtëzakonshëm në aspektin e ripërtëritjes së pyjeve dhe faunës në Shqipëri.
Përmendi edhe ndotjen dhe ndërtimet e paligjshme, që kanë çuar në krime mjedisore. Megjithatë sipas tij, ato janë ulur ndjeshëm vitet e fundit.
“Por nuk janë asgjësuar si problematika!”, pohoi kryeministri.
“Ne me ministrin e Mjedisit, me ekipin, jemi angazhuar në një proces reformimi të modelit të menaxhimit të pyjeve dhe natyrës në tërësi”, deklaroi Rama.
Paralajmëroi se duhen ristrukturuar Agjencia Kombëtare e Zonave të Mbrojtura (AKZM) dhe ajo e Pyjeve, në një të vetme.
“Duhet një agjenci që të merret 360 gradë me zonat e mbrojtura dhe pyjet!”
Veçoi sfidën e madhe me zjarret përgjatë verës.
“Po angazhojmë burime të reja financiare, për të future edhe teknologjinë, me pyllëzimet me dronë. Vitin që vjen do të rrisim financimet dhe intensitetin”, tha Rama, pa harruar krijimin e rrjetit të fidanishteve.
“Në këto vite që kemi përpara, që përkojnë me momentin historik të përpjekjes për anëtarësim në BE, fokusi te mjedisi, pyjet dhe menaxhimi i tyre, te zonat e mbrojtura, fuqizimi i një ekonomie të bazuar tek natyra, do të jetë shumë herë më i madh se sa deri sot”, përfundoi numri një i kabinetit.
