Kreu i grupit parlamentar të Partisë Socialiste, Taulant Balla, gjatë diskutimeve për mocionin me debat mbi gjetjet, konkluzionet dhe rekomandimet e raportit final të OSBE-ODIHR për zgjedhjet parlamentare të 11 majit 2025, theksoi nevojën për adresimin e disa pikave për reformën zgjedhore.
Lidhur me reformën zgjedhore, Balla nënvizoi se pas zgjedhjeve të 11 majit, numëruesit nuk duhet të vijnë më nga partitë politike, por të zgjidhen nga Komisioni Qendror i Zgjedhjeve (KQZ).
Balla theksoi gjithashtu nevojën për të adresuar financimin e partive politike dhe fushatave zgjedhore, duke shtuar se ka nisur puna për hartimin e një drafti ligjor për këtë çështje.
“Pas 35 viteve, kemi arritur që numëruesit të mos jenë më pjesë e partive politike. Sot kjo është një realitet me reformën e re zgjedhore. Nuk duhet që partitë të kenë lidhje me numërimin e votave; numëruesit duhet të zgjidhen nga KQZ. Raportin e OSBE-ODIHR-it duhet ta lexojmë me vëmendje dhe të adresojmë disa çështje, si përdorimi i teknologjisë në zgjedhje. Komisioni i posaçëm për reformën zgjedhore duhet të marrë në konsideratë këto diskutime. Një tjetër çështje urgjente është financimi i partive politike dhe i fushatave zgjedhore”, tha Balla.
Balla uroi dhe 35-vjetorin e Partisë Demokratike, por shtoi se kjo përkon me rezultatin më të dobët historik të saj, duke theksuar se humbja nuk është faj i socialistëve, por duhet parë tek vetë opozita.
“Le të urojmë Partinë Demokratike për 35-vjetorin e themelimit, megjithatë më vjen keq që ky përvjetor përkon me rezultatin më të dobët historik të partisë tuaj. Madje, ky rezultat është më i dobët edhe se në vitin 1997 dhe në të gjitha betejat ku ka udhëhequr Lulzim Basha, edhe pse ju desh të bashkoheshit gjatë rrugës edhe me ata që kishin mbetur jashtë nga LSI”, tha Balla.
Ai vuri në dukje edhe rolin e diasporës, duke shprehur nevojën për forcimin e lidhjeve dhe shërbimeve online për qytetarët jashtë vendit, përmes konsullatave dhe zyrave diplomatike.
“Duam që marrëdhëniet me diasporën të jenë më të forta, më të ngushta dhe të ofrohen më shumë shërbime përmes konsullatave, duke mundësuar edhe shërbime online”, tha ai.
