Ministri i Drejtësisë Ylli Manjani, nga Lezha ku ishte i pranishëm për prezantimin e drejtorit të ri të Hipotekës, komentoi edhe procesin e Reformës në Drejtësi si dhe Draftin e hartuar nga Ministria e Drejtësisë. Manjani përsëriti edhe njëherë deklaratën se është i nevojshëm dhe “ka ardhur koha për debat politik”.
Më tej deklaroi se drafti i propozuar nga Ministria e Drejtësisë “nuk është as i mazhorancës as i opozitës, por draft ekspertësh”.
Manjani prezantoi drejtorin e ri të Hipotekës në Lezhë i cili do të jetë Ardian Simoni. Manjani vlerësoi të emëruarin e tij, si një person mjaft profesional. Ministri gjithashtu u shpreh se institucioni në fjalë në zonën e Lezhës duhet të ofrojë shërbime më cilësore.
“Zyra juaj ka hasur problematika të shumta dhe ankesa të mëdha për shkak të shërbimit jo të mirë. Problem mbetet edhe fakti se keni qenë pre e mediave investigative, prandaj duhet më shumë punë. Duhet të përmirësoni imazhin tuaj dhe të ofroni shërbimet në cilësinë e duhur për qytetarët”, tha Manjani.
