Ambasadori amerikan Donald Lu ka nisur një takim në Presidencë me kreun e shtetit Bujar Nishani, ku fokus i diskutimeve besohet të jetë reforma në drejtësi dhe drafti që pritet të dalë nga mbledhja e ekspertëve, e cila përfundoi dje në darkë vetëm me pjesëmarrjen e atyre të mazhorancës, pas bojkotimit që iu bë nga ana e opozitës.
Sakaq, këtë të hënë ekspertët e maxhorancës, së bashku me ekspertë të huaj janë duke zhvilluar një mbledhje për draftin e reformës në drejtësi, takim në të cilin opozita nuk ka marrë pjesë. Nga ana e tyre, demokratët kanë thënë se ata nuk janë njoftuar për këtë takim.
Prej disa ditësh tashmë ambasadori Donald Lu zhvillon takime me krerë të lartë të shtetit, në lidhje me reformën në drejtësi dhe tejkalimin e ngërçit e tensionit që ka prodhuar mosdakortësia mes maxhorancës dhe opozitës, sidomos në formulën e votimit dhe zgjedhjes së anëtarëve të institucioneve më të larta të gjyqësorit, siç janë ata të Këshillit të Lartë të Drejtësisë apo të Gjykatës Kushtetuese.
Lu ka patur takime intensive me kreun e kuvendit Ilir Meta në lidhje me këtë çështje dhe më pas me vetë ekspertët e opozitës dhe mazhorancës për reformën në drejtësi, duke u bërë kështu ndërmjetës mes tyre. Por ndërmjetësimi i Lu, i cili është shprehur se SHBA nuk do të gjejë qetësi derisa reforma të kalojë, është sfumuar nga bojkoti i djeshëm i ekspertëve të opozitës. Nga ana tjetër, në orët e darkës së të dielës, ekspertët e maxhorancës thanë se ata tashmë e kanë përfunduar draftin për reformën dhe pritet që ta dorëzojnë këtë të fundit tek komisioni ad hoc, i drejtuar nga kryetari i komisioni të ligjeve ligjeve, socialisti Fatmir Xhafaj. Komisioni posaçëm do të shqyrtojë draftin, i cili më pas do të merret nga ekspertët e Komisionit të Venecias, të cilët priten të vijnë rreth datës 21 janar në Shqipëri, pikërisht për këtë çështje.
Përpjekja e Ambasadorit Lu dhe takimet e tij, vijnë në një kohë kur nuk po gjendet asnjë lloj konsensusi mes Maxhorancës dhe opozitës për një reformë që në variantin e saj më kuptimplotë, do duhej të kishte mbështetjen teknike e politike, të të gjitha palëve.
