Tashmë është e ditur se rubrika “Ligji i rrugës” në emisionin “Rudina” në Tv Klan i kushtohet tërësisht qytetarëve. Rastet e përditshmërisë, konfliktet apo keqkuptimet tani me avokaten Margarita Kola marrin një interpretim juridik, bazuar ligjit.
Pasditen e kësaj të mërkure, u mor rasti i gjetjes së një portofoli. Të gjithëve të paktën një herë na ka ndodhur që të gjejmë apo të na humbasë diçka, përfshirë këtu dhe portofolin. Për këtë avokatja tha se ligji nuk parashikon një ndëshkim për atë që e gjen diçka të humbur, duke ia kaluar gjithë përgjegjësinë moralit. Por, ama nënvizoi diçka tepër të rëndësishme që lidhet me përdorimin e dokumenteve që gjenden atje.
“Ligji nuk e ka përcaktuar taksativisht nëse është një vepër penale, që të gjesh diçka dhe të mos e dorëzosh, përfshirë këtu edhe portofolin. Nuk parashikohet si vepër penale, por natyrisht nëse përdor materialet të cilat i ke gjetur, si karta e identitetit apo kreditit atëherë është një vepër penale. Pra, ligji ia ka lënë moralit në këtë aspekt dhe nuk e ka përcaktuar si një vepër penale. Nëse do të kishim një ligj të shkruar dhe pikërisht një ne të përcaktuar, natyrisht do e konsideronte si një gjë që nuk ishte brenda moralit dhe personi duhet ta kthente portofolin. Nuk e ka shprehur ligji, por ama të gjitha pasojat që vijnë si pasojë e përdorimit të materialeve që gjenden në këtë portofol ose një material që nuk gjendet në portofol, por ti e ke gjetur diku tjetër është e paligjshme. Pra nuk merret me faktin që nëse ti gjen diçka dhe nuk e dorëzon, por merret me pasojat e përdorimit të materialit që ti gjen”, tha avokatja.
Në fund avokatja Margarita Kola sqaroi se gjetja e një portofoli ndryshon nga vjedhja e një të tilli. Prandaj në rastin e fundit nuk ka më rol morali, por ligji, pasi konsiderohet si një vepër penale.
