Reforma/ Meta ftesë Bashës për takim: Të arrijmë konsensus brenda të hënës

Pas takimit me dy ambasadorët e SHBA e BE Lu e Vlahutin, kryeparlamentari Ilir Meta deklaroi se i ka çuar një ftesë liderit të opozitës Lulzim Basha, për të patur një takim, në mënyrë që të arrihet konsensusi i reformës në drejtësi. Meta theksoi se formatin dhe vendin e takimit mund ta vendosë vetë Basha, teksa ftesës së tij, kryeparlamentari i ka shtuar se takimi do duhet bërë mundësisht brenda të hënës, pasi kohës për miratimin e reformës, po i vjen fundi.

Në lidhje me publikimin në kalendarin 3 javor të kuvendit të draftit të reformës, Meta tha se ka qenë një lapsus i administratës së parlamentit, por shtoi se tashmë prej kohësh, reforma do duhet të kishte hyrë në kalendar, pasi koha, është ajo që reformës i mungon më shumë. Sakaq administrata e kuvendit ka hequr reformën nga kalendari i punimeve të parlamentit.

“Ka qenë një keqkuptim i shërbimeve të Kuvendit, pra kjo çështje nuk është bërë pjesë e punimeve të kalendarit të kuvendtit. Gjithashtu dua tju bëj të ditur, se, si kryetar i kuvendit, i kam dërguar një ftesë zyrtare, Kreut të PD, Lulzim Basha, për tu takuar me të, në çdo kohë që ai e çmon të arsyeshme, në çdo vend që ai e çmon të arsyeshëm, por mundësisht deri ditën e hënë… Pasi jam i bindur se jemi tashmë të vonuar në kalendarin e reformës për ndryshimet kushtetuese të reformës në drejtësi, e cila nuk është përfshirë deri tani, për arsye të mos arritjes së kompromisit përfundimtar në komisionin e posaçëm. Por ndërkohë, jemi në limitet kohore, dhe duhet të reflektojmë dhe të lëvizim sa më shpejt. Reforma do duhej të ishte përfshirë me kohë në kalendarin e kuvendit… dhe shpresoj shumë që këtë gjë ta arrijmë sa më parë, sepse miratimi i kësaj reforme në kuvendin e shqipërisë, është shumë e rëndësisshme për të rritur besueshmërinë e vendit, në mënyrë që të forcojmë argumentat, për të marrë rekomandimin për të hapur negociatat me BE….

Takimi mes meje dhe Bashës është kërkuar nga unë si takim zyrtar, që do thotë nuk është informal, jam shumë fleksibël për gjithcka që ka të bëjë me vendin, formatin, dhe me cdo element tjetër, por nuk jam fleksibël te koha, në mes të natës, pa u gdhirë mirë, por mundësisht deri të hënën… ”- tha Meta.

Meta për akuzat e Ramës dhe Tahirit për gjyqtarin Aliaj: Për fat të mirë nuk kam qenë në Tiranë

Në lidhje me akuzat që ka bërë Kryeministri Rama dhe Ministri Tahiri në lidhje me gjyqtarin Aliaj, i cili vendosi për pezullimin e kreut të policisë Çako, Ilir Meta tha se për fat të mirë nuk ka qenë në Shqipëri, ditët kur janë bërë akuzat.

“Për fat të mirë nuk kam qenë këtu dhe nuk do të dëshiroja të dëgjoja shkëmbim akuzash midis përfaqësuesve të institucioneve… Ne jemi një vend demokratik, synojmë të forcojmë shtetin e së drejtës dhe një nga parimet bazë është ai i balancës dhe pavarësisë së institucioneve. Çdo institucion duhet të jetë shembull për zbatimin e ligjit.”- deklaroi Meta.

I pyetur për qëndrimin e Lëvizjes Socialiste për Integrim që reforma të bëhej me konsensus, Meta tha se nuk dëshironte të komentonte për këtë, pasi sot kishte dalë në konferencë ekskluzivisht si kryetar i Kuvendit./ java /a.k