Reforma, mësuesit do t’i nënshtrohen kualifikimit
Mësuesit do t’u nënshtrohen kualifikimeve dhe testimeve të vazhdueshme dhe kjo do të bëhet me qëllim rritjen e nivelit në procesin e mësimdhënies. Kryeministri i vendit, Edi Rama, ka deklaruar se po merren masat e nevojshme në mënyrë që sistemit arsimor t’i rikthehet dinjiteti.
Ai theksoi se mësuesit do të pajisen edhe me kartën e krediteve, e cila do të jetë një pasqyrë e rezultateve dhe ecurisë së tyre në punë. “Synimi ynë është të arrijmë në pikën që çdo mësues të ketë kartën e vet të krediteve, pra, licencën që certifikon shkallën e kapacitetit të çdo mësuesi. Kjo do t’i bëjë mësuesit njëherë e përgjithmonë të paprekshëm kur janë të duhurit dhe të pamundur për të qenë mësues, kur nuk janë të duhurit. Kjo do të bëjë përfundimisht të mundur depolitizimin e plotë dhe vendosjen e meritokracisë reale në të gjithë sistemin, duke i dhënë fund edhe korrupsionit”, tha Rama. Për sa i përket testimi të mësuesve, ai do të bëhet çdo fundviti dhe do të jetë thjesht vlerësues i njohurive për të parë nivelin në të cilin ndodhen punonjësit e sistemit arsimor në vend.
“Testimi i parë kombëtar vitin e shkuar dhe çelja e portalit i ka hapur rrugë, një sistemi automatik, bazuar mbi rezultatet. Testimi do të kryhet në fund të çdo viti për të gjithë ata që duan të rivlerësojnë pikët e tyre, por dhe për të gjithë ata që duan të rrisin besueshmërinë e tyre. Por ajo që është më e rëndësishme është që masat e marra dhe vënia në jetë e komisioneve të posaçme, që do të ndjekin transparencën e procesit nga testimi deri tek emërimi, për çdo emërim dhe çemërim, është një hap që mbyll një cikël historik dhe hap një cikël tjetër”, pohoi Kryeministri Rama. Ministrja e Arsimit, Lindita Nikolla, tha se këtë vit shkollor nxënësit nuk do të kenë më tekste jocilësore, pasi komisioni i ngritur nga institucioni që ajo drejton ka larguar nga tregu 600 libra me probleme. Për sa u përket librave të klasës së parë dhe të gjashtë, që këtë vit do të jenë të reja, ministrja deklaroi se nuk janë certifikuar ende, pasi pritet vlerësimi nga mësuesit, prindërit dhe shoqëria.
“Ky vit i ri shkollor fillon në sistemin tonë arsimor me 600 tekste të dala nga katalogu ekzistues dhe nga ana tjetër me tekste të reformuara të klasës së parë dhe të gjashtë. Me të njëjtën metodologji do të përzgjedhim tekstet shkollore të klasës së dytë dhe të shtatë dhe të vitit të parë gjimnaz dhe kështu me radhë në vitin e ardhshëm që brenda tri viteve të përmbushim me tekste të reja cilësore. Sigurisht, edhe këto tekste që janë kaluar dhe hedhur në sistem këtë vit për klasën e parë dhe të gjashtë nuk do të certifikohen menjëherë nga MAS, por do të kalojnë edhe njëherë në sitën e një pilotimi në kuptimin e një vëzhgimi nga gjithë mësuesit, prindërit dhe mbarë opinioni”, tha ministrja. Gjithashtu, Nikolla theksoi se këtë vit më shumë fëmijë do të përfitojnë tekste shkollore falas. Kjo do të thotë se familjet do marrin librat pa lekë për fëmijët e tretë dhe në vazhdim nëse kanë më shumë. Nëse një familje ka 5 fëmijë, ajo merr librat falas për dy fëmijët e fundit
