Pas të krishterëve të shqipërisë, ka qenë Komuniteti Mysliman ai që ka kërkuar një sjellje të matur nga Kuvendi sa i përket votimit të Reformës në Drejtësi.
Në një deklaratë të shpërndarë për mediat, KMSH thotë se klasa politike duhet të gjejë konsensusin në emër të interesit kombëtar.
Deklarata e plotë:
Komuniteti Mysliman i Shqipërisë është duke ndjekur me vëmendje zhvillimet e fundit të punimeve për reformën në drejtësi.
Duke parë rëndësinë e kësaj reforme, KMSH shpreson që Kuvendi i Shqipërisë do të reagojë maturisht dhe do bëjë zgjedhjen më të mirë të mundshme, e cila do të shërbejë në të mirë të qytetarëve dhe politikave të Republikës së Shqipërisë.
I bëjmë thirrje të gjithë klasës politike dhe grupeve të interesit të gjejnë rrugën e përbashkët dhe të bien në konsensus për reformën në drejtësi, duke marrë parasysh interesin kombëtar dhe mbarëshoqëror.
Ne jemi përkrah çdo nisme e cila i shërbën shoqërisë shqiptare dhe që sjell zhvillim dhe prosperitet në vendin tonë.
