Agjencia e Mbikëqyrjes Policore ka arrestuar 11 persona gjatë muajit korrik, 8 prej tyre punonjës policie.
Në Prokurori janë referuar 54 raste për hetim ndaj punonjësve të Policisë, kryesisht për shpërdorim detyre, veprime arbitrare dhe shkelje të rregullave të qarkullimit.
Gjatë korrikut, AMP ka trajtuar edhe 111 ankesa të qytetarëve, ndërsa ka kryer 3 inspektime dhe ka nisur hetime disiplinore për 6 punonjës policie.
Në fokus të referimeve kanë qenë kryesisht rastet e shpërdorimit të detyrës, veprimeve arbitrare, dëmtimeve të tjera me dashje dhe kanosjes, si dhe shkeljeve të rregullave të qarkullimit rrugor.
Sipas AMP-së, çështjet e referuara ndahen në:
-14 raste për shpërdorim detyre, ndaj 15 subjekteve;
-25 raste për veprime arbitrare, dëmtime të tjera me dashje, kanosje etj.;
-5 raste për shkelje të rregullave të qarkullimit rrugor, ndaj 5 subjekteve dhe 1 shtetasi.
-111 ankesa të trajtuara
Gjatë korrikut, AMP ka administruar 111 ankesa. Nga këto, 15 janë vlerësuar si të bazuara, 62 të pabazuara, ndërsa në 32 raste shkeljet nuk janë provuar. Në 2 raste janë hapur dosje penale.
Gjithashtu, janë administruar edhe 160 ankesa administrative dhe 420 telefonata nga qytetarët
“Në linjën e komunikimit me qytetarët janë regjistruar gjithsej 420 telefonata. Prej tyre, 253 kanë qenë brenda fushës së veprimtarisë së AMP-së, 104 jashtë kompetencës së saj, ndërsa në 63 raste qytetarëve u është dhënë informacion”, thuhet në njoftim.
Procedime disiplinore
Komisioni Disiplinor i AMP-së ka vendosur fillimin e hetimit disiplinor për shkelje të rëndë ndaj 6 punonjësve të Policisë.
Për një punonjës është vendosur mosfillimi i hetimit, pasi shkelja nuk është provuar. Ndërkohë, për 26 punonjës policie dhe 2 punonjës të Mbrojtjes nga Zjarri dhe Shpëtimit, procedurat janë ende në fazën e shqyrtimit të dokumentacionit.
Gjatë korrikut, AMP ka kryer gjithashtu 3 inspektime, një të planifikuar dhe dy të paplanifikuara, me qëllim verifikimin e veprimtarisë së strukturave përkatëse.
Bilanci i muajit korrik pasqyron aktivitetin e AMP-së në drejtim të hetimeve penale, procedimeve disiplinore, trajtimit të ankesave dhe komunikimit me qytetarët.
