Trajneri Rafa Benitez, pasi ka marrë besimin e drejtuesve të Real Madrid mund të krenohet me sigurinë e vendit të parë në Grupin A. Cristiano Ronaldo shënoi golin e parë ndaj Shakhtar duke shënuar me portën e boshatisur, me një goditje të saktë me kokë. Portugezi nuk kishte shënuar në dy ndeshjet e fundit, asnjëherë nuk ka mbushur tre ndeshje radhazi pa shënuar gol.
Në pjesën e dytë, Luca Modric shënoi golin e dytë për Realin, ndërsa shifrat shkuan 0-3 vetëm 120 sekonda më vonë kur Carvajal shënoi një gol të mrekullueshëm me të majtën. Cristiano Ronaldo shënoi edhe golin e katërt duke kompletuar “pokerin” e Realit. “CR7”, me tetë gola, është golashënuesi më i mirë i këtij edicioni të Champions League.
Shakhtar e bëri më “të ëmbël” humbjen duke shënuar tre gola në 13 minutat e fundit. Teixeira gjeti golin me penallti, ndërsa braziliani tjetër Dentinho shënoi me gjoks, me portën e boshatisur. Aktivizimi i Tyson e shtoi rrezikshmërinë e vendasve, që shënuan edhe golin e tretë me anë të Teixeira, por nuk arritën t’i prishin festën Realit që ka fituar katër dhe barazuar një nga pesë ndeshjet e luajtura.
ë ndeshjen e rikthimit të Ibrahimovic në shtëpi, Parisi shënoi vetëm pas tre minutash lojë. Van Der Wiel krosoi nga e djathta dhe Rabiot shënoi me kokë. Në minutën e 14-të, me një depërtim në zonë, Di Maria shënoi golin e dytë, pas pasimit të marrë nga Matuidi. Ky ishte goli numër 7000 në historinë e Champions League.
Në minutën e pestë të pjesës së dytë, Ibrahimovic shënoi golin e tretë për ekipin francez, të parin për të në Champions League në vitin 2015, por nuk festoi, si shenjë respekti për ish-tifozët e tij. Ibrahimovic nuk shënonte prej 680 minuta, “agjërimi” i tij më i madh në karrierë në veprimtarinë elitare.
Kur u mbush një orë lojë, kampionët e Suedisë fituan një 11-metërsh, por Rosenberg e shpërdori duke goditur shtyllën. Ndërkohë, Parisi shënoi golin e katër me Di Marian, pas një “shpikje” të Maxwell. Tetë minuta para fundit të ndeshjes skuadra e Blanc kompletoi “shuplakën” me golin e shënuar nga braziliani Lucas Silva. (telesport)
