Kur duhen edhe 3 ditë të mbahet protesta e lajmëruar e opozitës të hënën më 22 dhjetor, kryetari i PD, Sali Berisha, ka vendosur të largojë Ervin Salianjin nga posti i drejtuesit politik në Njësinë 6 në Tiranë.
Lajmi është konfirmuar nga vetë ish-deputeti Salianji për Report Tv.
Por, Partia Demokratike mohon që Salianji të ketë pasur një detyrë të tillë, pasi sipas saj “drejtues politik në Tiranë ka qenë Belind Këlliçi”, ndërsa ish-deputeti ka qenë i deleguar për fushatën në Njësinë 6, por të deleguarit u tërhoqën pasi zgjedhjet e parakohshme për kryetar të Bashkisë Tiranë nuk u zhvilluan.
Sidoqoftë, ashtu si Berisha, edhe në reagimin e Partisë Demokratike thuhet se “Salianji me aktivitetin e Elbasanit të realizuar nga Suel Çela është vetëpërjashtuar”.
“Nuk ka qenë drejtues politik. Drejtues politik në Tiranë ka qenë Belind Kellici. Ai ishte i deleguar për fushatën. Fushata u ndërpre dhe të deleguarit për fushatën i tërhoqëm. Por, siç e dini, Salianji me aktivitetin e Elbasanit të realizuar nga Suel Cela është vetëpërjashtuar”,- thuhet në reagimin e PD-së.
Ervin Salianji ka qenë aktiv në këtë njësi, veçanërisht në zonën e Kombinatit, ku takimet e zhvilluara nga ai me strukturat dhe simpatizantët e PD-së janë karakterizuar nga pjesëmarrje e gjerë dhe një angazhim i dukshëm i të rinjve.
