Teksa Ilir Meta apo kalon ditën e tretë në burg, partia e tij ka reaguar publikisht duke hedhur akuza ndaj mazhorancës.
Sipas Tedi Blushit, Meta po mbahet pa prova në qeli me urdhër të Edi Ramës. E gjitha, tha Blushi, bëhet sepse Ilir Meta ka treguar që është një patriot i madh.
“Ilir Meta mbahet politikisht në burg pa u provuar asnjë akuza. E gjitha bëhet sepse ai ka mbrojtur interesin kombëtar në vijimësi, sidomos për rastin e Kosovës ku është shprehur kundër Ballkanit të Hapur” – tha Blushi.
Ai justifikoi shefin e tij duke u shprehur se ka 12 vite që nuk ka të drejtë firme. Ndaj si rrjedhojë, Meta nuk duhet gjykuar për korrupsion për çfarë ka firmosur më parë, por vetëm për këtë periudhë që s’ka patur pushtet ekzekutiv.
“Arrestimi konfirmon se ka rënë shteti ligjor. Edi Rama përmes agjentëve të SHISH është përpjekur prej kohësh të marrë peng Partinë e Lirisë. Së fundmi arritën përmes një akti terrorist të na rrëmbejnë presidentin Meta. SPAK po përdoret si vrasës me pagesë.” – tha Tedi Blushi i cili si Meta hodhi akuza të rënda ndaj Altin Dumanit.
/a.r
