Deputetja e Partisë Demokratike, Majlinda Bregu nuk ka qenë sot e pranishme në protestën e organizuar nga opozita.
E kontaktuar nga gazetarja e “News 24”, Elda Menga, ish-ministrja e Integrimit ka sqaruar edhe arsyen e mungesës. “Për shkak të një vizite pune me kolegë nga Parlamenti i Kosovës, Serbisë, Ukrainës dhe Gjeorgjisë në SHBA, nuk kam mundur të jem në protestën e sotme të PD”, – shprehet Bregu për “BalkanWeb”.
Mandej ajo ka shtuar se ndihet e kënaqur që ka parë protestën sipas saj më të madhe të këtyre viteve.
“Por jam e kënaqur që kjo ishte protesta më e madhe e këtyre viteve dhe po aq e bindur se nuk ka çështje më të rëndësishme se sa rikthimi i demokracisë në vend, përmes zgjedhjeve të lira e të ndershme, luftës kundër krimit dhe korrupsionit, hapjes rrugë të zbatimit të ligjit dhe rikthimit të besimit tek politika e ndershme dhe jo e pazareve”, – ka deklaruar Bregu për “BalkanWeb”.