Reagon Gjin Gjoni: Iu përgjigja thirrjes “o sot, o kurrë” dhe tani iu futa politikës. Kam qenë gjyqtar i ndershëm, pasuria ime është e ligjshme

I famshmi Gjin Gjoni, i cili tashmë është kryetar i degës së PD-së në Lezhë, e konsideroi vendimmarrjen e socialistëve në Kuvend për të mbrojtur mandatin e Olta Xhaçkës, si vdekjen e reformës në drejtësi.

tha se, sipas mendimit të tij, reforma në drejtësi ishte selektive.

“Në kohën më parë sistemi i drejtësisë ishte 60 % të majtë dhe 40 % të djathtë, në këto raporte ka qenë.

Sot sistemi i drejtësisë është 100 % i majtë. Ata që kanë kaluar reformën ose janë pjesë e konjukturave të momentit ose janë me lidhje me sistemin komunist”, tha Gjoni.

Referuar vendimit ndaj Sali Berishës, Gjin Gjoni tha se nëse do të përdoret ky standard të gjithë kryeministrat duhet të jenë në hetim për vendimet që kanë marrë.

“Gjithçka lidhet me shkak pasojë dhe në rastin e liderit të opozitës për çështjen që i është vendosur masa e arrestit, nuk ka pasojë”, tha Gjoni.

Gjoni tha se ka qenë student i dhjetorit, ka qenë i deleguar i PD-së në zgjedhjet e 1991 në Lezhë.

Më pas ai ka sqaruar se karriera e tij ka vijuar në fushën e drejtësisë deri në momentin që është larguar, dhe sot është kryetar i PD-së, pas një pauze mbi dy vjeçare, pas dorëheqjes nga sistemi i drejtësisë.

“Kam dhënë dorëheqjen si gjyqtar, për një periudhë kohe kam qëndruar në një situatë pezull, jam marrë me avokati.

Në 2014 është bërë një hetim mbi pasurinë time, organet e drejtësisë kanë dhënë një vendim në të gjitha shkallët e gjykimit.

Por edhe dy vjet pas dorëheqjes sime KPK ka bërë një kallëzim në SPAK, megjithëse çështja nuk është mbyllur me procedurë sikundër pretendohet, por ka pasur vendim në të gjitha shkallët e gjykimit.

Nga 2003 deri në 2023 është bërë një verifikim tërësor i pasurisë sime”, tha Gjoni për televizionin e familjes Berisha.

Ai tha se iu përgjigj thirrjes “o sot, o kurrë”, duke shtuar se ndjen me dhembje shpopullimin që i ndodh Shqipërisë.

Gjoni tha se rrjedh nga një familje e djathtë, e persekutuar nga regjimi komunist, duke shtuar se “Shqipëria është demokraci hibride, dhe këtë ma ka thënë një miku im politikan gjerman”/m.j