Ministria e Brendshme ka reaguar lidhur me lajmin e publikuar në mediumin në pronësi të analistit Artur Zheji, për një “raport sekret” mbi kultivimin e hashashit në Shqipëri, duke e përgënjeshtruar atë.
“Lidhur me lajmin e publikuar në mediat online, mbi ekzistencën e një raporti sekret për kultivimin e drogës në Shqipëri, Ministria e Punëve të Brendshme bën me dije se ky lajm është tërësisht i pavërtetë. Ai që është cilësuar si raport sekret, është vetëm vazhdim i “dokumentave” të fabrikuara e të sajuara qëllimisht për të shpifur e hedhur baltë mbi punën e Policisë”, thuhet në reagimin e ministrisë së Brendshme
Më tej MPB deklaron me përgjegjësi edhe njëherë se një raport i tillë, botuar në mediat online, nuk ka ekzistuar dhe nuk ekziston. Ministria e Punëve të Brendshme beson se qëllimi i fabrikimit të këtij lajmi, fsheh interesa personale, politike, por që në thelb mbeten interesa të paligjshme e kriminale.
“MPB përsërit se rezultatet kundër drogës janë prova e vërtetë e vullnetit dhe punës së Policisë së Shtetit. Një tjetër provë e kësaj dëshmie, është besimi i palëkundur i partnerëve ndërkombëtarë”, përfundon deklarata./a.k
