Rreth 3/4 e fëmijëve të varfër në Shqipëri raportojnë të kenë ndeshur dhunë apo abuzim në jetën e tyre, por më pak se 15% kanë treguar këto raste.
Këto të dhëna u bënë të ditura nga prezantimi i Raportit të Mirëqenies së Fëmijëve 2015 nga organizata ndërkombëtare që operon në Shqipëri, World Vision.
Raporti tregon gjithashtu se, në shumë nga zonat më të varfëra të vendit, nuk ka mjaftueshëm punonjës për mbrojtjen e fëmijëve për të përballuar nevojën dhe për pasojë, dhjetëra mijëra fëmijë mund të jenë duke përjetuar dhunë dhe abuzim, pa kujdesin e duhur të shtetit.
Raporti i Mirëqenies Sociale është hartuar nga intervista të kryera në fund të vitit 2015 me më shumë se 8 000 të rritur dhe fëmijë nga zona të shtrira në të gjithë vendin ndërkohë që pyetjet variojnë nga përvoja me abuzimin, mundësia për të marrë shërbime sociale, përvoja në shkollë dhe përfshirja në jetën e zonës ku të pyeturit jetojnë.
Të dhënat e përfshira në raport do të publikohen çdo vit në të ardhmen, për të shërbyer si një barometër i mirëqenies së fëmijëve në vend.
