Ministrja e Shtetit për Mbrojtjen e Sipërmarrjes, Sonila Qato ka publikuar raportin mbi trajtimin e ankesave dhe sugjerimeve të sipërmarrjes për muajin mars 2018, ku vihet re se janë shqyrtuar 42 kërkesa, prej të cilave 33 kërkesë/ankesa, pas këshillimeve dhe gjetjes së hapësirave ligjore, janë trajtuar dhe zgjidhur.
Gjatë marsit u zhvilluan 7 tryeza të suksesshme sektoriale ndërmjet grupeve të interesit dhe institucioneve përkatëse, rezultatet e të cilave do të botohen në një raport të posatshëm në fund të muajit prill. Sipas Qatos marrëdhënia Qeveri-sipërmarrje ka hyrë tashmë në një fazë të re, atë të konkretësisë dhe bashkëpunimit të ndërsjellë.
Raporti i plotë:
Në detyrën e Ministrit të Shtetit për Mbrojtjen e Sipërmarrjes, në përmbushje të misionit të ndërmarrë për përmirësimin e klimës së biznesit në vend, lejomëni të ndaj me ju raportin e gjashtë të trajtimit të ankesave, në kuadër të njoftimeve periodike dhe raportimit mbi punën e kryer gjatë secilit muaj të kaluar. Përmes këtij dokumenti, në emër të transparencës ju raportojmë kërkesat dhe sugjerimet e ardhura nga ju gjatë muajit mars si dhe zgjidhjen e ndërmarrë nga zyra jonë. Gjithsej kemi shqyrtuar 42 kërkesa, prej të cilave 33 kërkesë/ankesa, pas këshillimeve dhe gjetjes së hapësirave ligjore, janë trajtuar dhe zgjidhur.
Gjithashtu gjatë muajit mars kemi zhvilluar dhe 7 tryeza të suksesshme sektoriale ndërmjet grupeve të interesit dhe institucioneve përkatëse, rezultatet e të cilave do të botohen në një raport të posatshëm në fund të muajit prill. Gjatë muajit mars, kemi mbështetur ankesën e paraqitur nga ana e Shoqatës së Riciklimit të Mbetjeve, e cila denoncoi në emër të 31 kompanive që operojnë në territorin e Bashkisë Tiranë, shkelje proceduriale gjatë kontrollit të ushtruar nga ana e Inspektoriatit përgjegjës, për të cilat u morën masa korrigjuese nga ana e këtij institucioni. Gjithashtu zyra jonë kontribuoi në procesin e rishikimit të Projektligjit për ushqimin (Për disa shtesa dhe ndryshime në ligjin nr.9863, datë 28.01.2008 “për ushqimin”, i ndryshuar). Duke besuar se marrëdhënia Qeveri-sipërmarrje ka hyrë tashmë në një fazë të re, atë të konkretësisë dhe bashkëpunimit të ndërsjellë, lutem konsiderojeni këtë dokument-raport si vullnet për komunikim intensiv, e sidomos si shteg përmes të cilit të drejtoni cdo shqetësim tuajin. Mbetem me konsideratë./ma.me
