Kreu i SPAK, Klodian Braho, ka prezantuar raportin vjetor për vitin 2025 përpara KLP, duke theksuar një rritje të ndjeshme të hetimeve dhe intensifikim i hetimeve financiare ndaj zyrtarëve të lartë dhe grupeve kriminale.
Sipas raportit, gjatë vitit 2025 janë hetuar gjithsej 871 procedime penale, një rritje prej 4.9% krahasuar me vitin 2024.
“Gjatë këtij viti janë hetuar 871 procedime penale, ose 4.9% më shumë se në vitin 2024. Krahasuar me vitin 2024, masa e “arrestit me burg” ka shënuar rënie me 53.4% gjatë vitit 2025”, tha Braho.
Në fokus të veçantë kanë qenë hetimet për korrupsion në nivele të larta, ku SPAK ka regjistruar një rritje me 18% të çështjeve të reja. Braho tha se raporti evidenton se niveli i korrupsionit në nivele të larta mbetet shqetësues, pavarësisht rritjes së aktivitetit hetimor.
Sipas Brahos në total, 30 zyrtarë dhe ish-zyrtarë janë përfshirë në procese gjyqësore, nga të cilët 18 janë dërguar për gjykim dhe 10 janë dënuar me vendim të formës së prerë.
“Lidhur me korrupsionin në nivele të larta, të dhënat për vitin 2025 tregojnë se niveli i tij mbetet shqetësues. SPAK ka shënuar një rritje me 18% të çështjeve të reja për korrupsion krahasuar me një vit më parë. Janë regjistruar 10 procedime me 123 të pandehur ndaj zyrtarëve të lartë. Po ashtu, SPAK ka nisur 6 procedime të reja me 13 persona në hetim për veprën e korrupsionit.
Në total, 30 zyrtarë dhe ish-zyrtarë janë përfshirë në procese, ku 18 prej tyre janë dërguar në gjykatë dhe 10 janë dënuar me vendim të formës së prerë.
Sa i përket krimit të organizuar, gjatë vitit 2025 ka pasur një rritje me 11.5% të personave në hetim krahasuar me një vit më parë, çka tregon një hetim më cilësor”, tha Braho.
Gjithashtu, SPAK ka intensifikuar hetimet financiare, duke zbuluar skema komplekse të pastrimit të parave. Gjatë vitit 2025 janë sekuestruar dhe konfiskuar rreth 45.4 milionë euro pasuri, përfshirë edhe kriptovaluta me vlerë 12.4 milionë euro. Nga këto, 1.1 milionë euro i përkasin pasurive të konfiskuara nga zyrtarë të lartë.
“Hetimi financiar gjatë vitit 2025 ka shënuar rritje të numrit të prokurorëve dhe ka mundësuar rritjen e cilësisë së hetimeve, duke zbardhur skema komplekse të pastrimit të parave dhe transferta të dyshimta. Gjatë vitit 2025 janë sekuestruar dhe konfiskuar rreth 45.4 milionë euro, ku përfshihen edhe kriptovaluta me vlerë 12.4 milionë euro. Vlera e pasurive të konfiskuara për zyrtarët e lartë për vitin 2025 është në shifrën 1.1 milionë euro”, tha ai.
