Organizata e Kombeve të Bashkuara ka publikuar pak ditë më parë një raport për situatën parazgjedhore në Shqipëri. Sipas raportit të publikuar nga OKB, ngrihet shqetësimi se ka një tendencë që të ketë blerje apo vjedhje të votave.
Në raport thuhet se pjesa më e madhe e qytetarëve shohin si problematikë manipulimin e rezultatit zgjedhor dhe mosndëshkimin e personave përgjegjës. Po ashtu OKB thekson se qytetarët nuk i njohin një pjesë të kandidatëve për kryetarë bashkie. Jo vetëm kaq por qytetarët shqiptarë nuk kanë aspak njohuri për kandidatët e Këshillave Bashkiakë në këto zgjedhje vendore.
“Pjesëmarrësit në një masë të madhe pranuan se ka raste të vjedhjes/shitblerjes së votës në format e presioneve/kërcënimeve fizike apo psikologjike, presione/kërcënime nga punëdhënësit dhe këmbimi i votës me para apo të mira materiale. Megjithatë, thuajse të gjithë pjesëmarrësit (95% e tyre) nuk ishin në dijeni të ndonjë personi të ndëshkuar për këto veprime. Vetëm disa pjesëmarrës ishin në gjendje të përmendnin masat ndëshkuese, që varionin nga gjobitje në burgosje”, thuhet në raport.
Nga ana e saj, OKB ka sugjeruar që të rritet sensibilizimi dhe t’u bëhet e qartë qytetarëve dhe pushtetarëve që mund të ndëshkohen në rast të konstatimit të shitblerjes së votave.
Raporti i OKB është hartuar mbi bazën e disa grupeve të fokusuar në disa territore të Shqipërisë, ku qytetarë të moshave dhe gjinive të ndryshme janë pyetur mbi situatën parazgjedhore në Shqipëri. Pjesë më madhe e fokus-grupeve është mbajtur në zonat periferike, të cilat janë prekur edhe nga reforma territoriale.
