Gjatë auditimeve të kryera vitin e kaluar, Kontrolli i Lartë i Shtetit ka evidentuar shkelje, parregullsi në respektimin e ligjeve të shtetit nga ana e punonjësve të administratës, në qendër e në bazë, me një vlerë kolosale dëmi për buxhetin: 110.5 miliardë lekë, ose 825.6 milionë euro. Shkeljet financiare përgjithësisht i përkasin veprimtarisë ekonomiko-financiare për periudhën kohore 2014-2016.
Në raportin e katërt për vitin 2017, të publikuar ditën e djeshme, KLSH vëren se janë zbuluar dy lloj parregullsish: parregullsi dhe shkelje financiare, në të ardhurat dhe në shpenzimet e kryera, me dëm ekonomik në shumën totale prej 11.5 miliardë lekë ose 85.8 milionë euro; shkelje të disiplinës financiare me ndikim negativ në perfomancën e subjekteve të audituara, në shumën totale prej 99.05 miliardë lekë, afërsisht 739.7 milionë euro, nga e cila: 92.7 miliardë lekë në fushën e të ardhurave, afërsisht 692.1 milionë euro dhe 6.3 miliardë lekë afërsisht 47.8 milionë euro, në fushën e shpenzimeve jo me eficiencë, efektivitet dhe ekonomicitet të fondeve.
Nga ana tjetër, konstatohet se për vitin 2016 rritja e detyrimeve ndaj tatimeve dhe doganave (borxhi tatimor dhe doganor) si dhe skemës së sigurimeve shoqërore është në vlerën 51.17 miliardë lekë ose 41% më e lartë se viti 2015.Rekordin për dëmet më të larta sipas fushës e mban pjesa e shitjes dhe dhënies me qira të pasurisë shtetërore, që rezulton me një vlerë 4.1 miliardë lekë. Në vendin e dytë është pjesa e riblerjes së pasurisë shtetërore me 2.89 miliardë lekë. Doganat janë të renditura si të tretat me një vlerë dëmi të konstatuar prej 1.9 miliardë lekë, kurse prokurimet në vendin e katërt me 1.58 miliardë lekë.
Grupi i tatimtaksave rezulton me një dëm prej 370 milionë lekësh, për t’u pasuar nga shpenzimet operative me 251 milionë lekë. Dëmi më i vogël është konstatuar në fushën e paga-shpërblimeve dhe sigurimeve shoqërore me 91 milionë lekë dhe në fund urbanistika me 8.8 milionë lekë.
Pjesa e mbetur e sektorëve të audituar por që nuk klasifikohet në asnjë nga fushat e mësipërme është grupuar nën emërtimin “Të tjera” me një vlerë 503 milionë lekë.
Gjatë periudhës janar – dhjetor 2017, nga ana e KLSH janë rekomanduar 2.082 masa organizative, nga të cilat 1.108 janë pranuar nga subjektet, 751 janë në proces zbatimi dhe 233 janë duke u shqyrtuar. Po gjatë kësaj periudhe, nga ana e KLSH-së janë bërë 47 kallëzime penale, për drejtues kryesisht të rangut të mesëm dhe të lartë.
Dëmi ekonomik i shkaktuar shtetit dhe disa nga institucionet me shkelje më të mëdha
Në sektorin e Tatim – Taksave 376.1 milionë lekë
Drejtoria e Përgjithshme e Tatimeve 58.2 milionë lekë
Bashkia Cërrik 36.3 milionë lekë
Bashkia Himarë 35.7 milionë lekë
Projekti “Menaxhimi i mbetjeve të ngurta të Shqipërisë”, Ministria e Transportit dhe Infrastrukturës 27.9 milionë lekë
Në sektorin e doganave 1.64 miliardë lekë
Dega e doganës Berat 108.6 milionë lekë
Dega e Doganës Durrës 381.3 milionë lekë
Dega e Doganës Tiranë 800.2 milionë lekë
Drejtoria e Përgjithshme e Doganave 153.8 milionë lekë
Në fushën e prokurimeve 1.6 miliardë lekë
Bashkia Sarandë 32.3 milionë lekë
Bashkia Tepelenë 26.6 milionë lekë
Bashkia Himarë 21.9 milionë lekë
Komisioni i Prokurimit Publik 248.9 milionë lekë
KESH 95.3 milionë lekë
Ministria e Energjisë dhe Industrisë 247.6 milionë lekë
Autoriteti Rrugor Shqiptar 202.6 milionë lekë
Në fushën e shitjes, blerjes dhe dhënies me qira të pasurisë shtetërore 7 miliardë lekë
Ministria e Bujqësisë, Zhvillimit Rural dhe Administrimit të Ujërave, 13.5 milionë lekë
Ministria e Energjisë dhe Industrisë 433.2 milionë lekë
OSHEE 2 miliardë lekë
KESH 863.3 milionë lekë
Albpetrol 500.2 milionë lekë
Në fushën e pagave, shpërblimeve dhe sigurimeve shoqërore 94.5 milionë lekë
Ministria e Transporteve dhe Infrastrukturës 35.9 milionë lekë
Ministria e Punëve të Jashtme 15.9 milionë lekë
Bashkia Fier 10.2 milionë lekë
Në fushën e urbanistikës 8.9 milionë lekë
Të tjera 503 milionë lekë
Të ardhura të munguara
Agjencia Kombëtare e Burimeve Natyrore, Tiranë 19.8 miliardë lekë
Ministria e Energjisë dhe Industrisë 94.6 milionë lekë
Ministria e Zhvillimit Ekonomik, Turizmit, Tregtisë dhe Sipërmarrjes 2.5 miliardë lekë
Autoriteti i Mbikëqyrjes së Lojërave të fatit 50.3 miliardë lekë
Instituti i Sigurimeve Shoqërore 5.9 miliardë lekë
Ujësjellës Kanalizime Tiranë 744.4 milionë lekë
KESH 9.3 miliardë lekë
Shpenzime me dëm për buxhetin
Fondi i Sigurimit të Detyrueshëm të Kujdesit Shëndetësor 1.8 miliardë lekë
Drejtoria e Përgjithshëm të Thesarit 1 miliard lekë
Bashkia Sarandë 539.8 milionë lekë
