Raporti vjetor i DASH për të drejtat e njeriut ishte në fokus të fjalimit të deputetes demokrate Albana Vokshi në Parlament. Deputetja e opozitës tha se të drejtat e qytetarëve në vendin tonë kërcënohen në të gjithë sektorët, e sidomos në drejtësi e shëndetësi.
“Në kohën kur Rama ndodhet në SHBA, DASH publikoi raportin për të drejtat e njeriut por 2015, ku thuhet se këto të drejta kërcënohen nga korrupsioni në të gjithë degët, e kryesisht në sistemin e shëndetësisë e të drejtësisë, e sidomos nga dhuna në familje. Vetëm dje një kryetar bashkie kërcënoi një nënë, ndërsa pas kësaj u dekorua nga ministri. Vetë këta dhunojnë qytetarët. Edhe pas reagimeve për këtë ngjarje, ende nuk ka nisur ndonjë hetim apo procedim. Raporti i DASH për të dytin vit radhazi thekson se edhe sistemi shëndetësor në vend rrezikohet nga korrupsioni.
Krimi dhe korrupsioni ka uzurpuar të gjitha zyrat e shtetit, dhe kjo thuhet në raport.
Shumica po pengon reformën në drejtësi.
Ne deputetët e opozitës do të vazhdojmë të denoncojmë situatën në sistemin e shëndetësisë. Para një jave, ministri me çimçakiz në gojë u shfaq duke shkuar në një mort, dhe sulmoi Pëllumb Sulon, i cili më pas u kërcënua nga shoqëruesit e tij, teksa filmonte në spitalin e Shkodrës”, tha deputetja Vokshi.
