Anglezët tallen shpesh me italianët, duke i quajtur “çuna mamaje”, pasi janë shumë të lidhur me nënat e tyre dhe preferojnë të jetojnë me to edhe kur janë në moshë madhore. Por historia e Claudio Ranierit i ka bërë për vete, teksa trajneri i Leicester City ka rrëfyer në konferencë për shtyp se nuk do ta shohë ndeshjen e Chelsea-Tottenham pasi do të jetë në Itali për të takuar nënën e tij.
Nuk do të jetë një ndeshje e zakonshme, pasi, nëse Tottenham nuk fiton, Leicester shpallet kampion dy javë para përfundimit. Ranieri thotë se nuk do të shohë këtë ndeshje, por jo për arsye supersticioni apo për të bërë “interesantin”.
“Pasi të përfundojë kjo konferencë (pas ndeshjes me Manchester United) do të shkoj në Itali. Do të kthehem të hënën në mbrëmje, do të jem në ajër gjatë kohës së ndeshjes dhe do ta marr vesh i fundit në Britani rezultatin, vetëm kur të zbres”, thotë Ranieri.
I pyetur se pse po shkon në Itali në këto momente kaq të rëndësishme, trajneri thotë se e bën për takuar nënën e tij.
Mos ka ditëlindjen? “Jo, thjesht për ta parë. Ajo është 96 vjeç, do ta shoh, do të qëndrojmë e do të hamë bashkë”, shpjegon trajneri 64-vjeçar.
Pas fjalëve të tilla, komentuesit e lajmeve në internet kanë shprehur admirim të thellë për këtë zotëri të vërtetë.
Sikur të mos mjaftonte që i ka bërë për vete të gjithë me marshimin e pabesueshëm të skuadrës së tij…
D. Ikonomi
