Kryeministri i vendit, Edi Rama, i ftuar në studsion e ABC News ka komentuar situatën aktuale politike dhe akzuat ndaj Minsitrit të Brendshëm Fatmir Xhafaj.
I pyetur rreth zhvillimeve më të fundit pas publikimit të audio-përgjimit për vëllain e ministrit, i cili akuzohet nga opozita se dëgjohet duke bërë pazare droge, dhe se mbrohet nga vëllai ministër, Rama u shpreh se ka opinion pozitiv për Ministrin e Brendshëm.
“Unë kam një opinion pozitiv në punën e ministrit bazuar në fakte, në rezultate në përkushtimin e tij në një punë për të çuar përpara transformimin e Policisë së Shtetit. Shenjat e qarta që policia ka dhënë në goditjen e krimit të organizuar, por edhe në disa prekje interesash të fshehta të krimit me politikën e ka vënë në shenjestër ministrin Xhafaj”, u shpreh kryeministri Rama nga Gjirokastra.
Sipas kryeministrit të vendit, e gjitha kjo bëhet për të dështuar hapjen e negociatave. Rama tha se kjo është histori e vjetër dhe se e ka bërë me vetëdije zgjedhjen e Fatmir Xhafajt si ministër të Brendshëm.
“Edhe opozita, edhe mediat e kanë nxjerrë në pah edhe e kanë publikuar disa herë në të shkuarën dhe kjo është këmbëngulja e opozitës për të bërë çmos që procesi i çeljes së negociatave të dështojë. Unë gjykoj punën dhe rezultatet. Kur unë kam bërë këtë zgjedhje ndaj Fatmir Xhafajt, unë e kam ditur se kush është ai”, tha Rama./a.m.
