Kryeministri Edi Rama ka vlerësuar maksimalisht atletin shqiptar Izmir Smajlaj, që ditën e djeshme ngriti në këmbë zemrat e shqiptarëve duke u shpallur kampion Europe në stadiumin e Beogradit.
Përmes një postimi në Facebook, Rama falënderon sportistin shqiptar, teksa thekson se i gjithë stadiumi i Beogradit është ngritur në këmbë nën tingujt e himnit tonë kombëtar.
“Faaaan – taaaaa- stiiiiik!…. Izmir SMAJLAJ, kampioni i parë europian në historinë e atletikës shqiptare, ngre në këmbë stadiumin e Beogradit nën tingujt e himnit tonë kombëtar. Faleminderit nga zemra Kampion”, shkruan Rama në rrjetet sociale.
Atleti shqiptar Izmir Smajli triumfoi të shtunën në Beograd duke u shpallur kampion Europe. Ai u rendit i pari në disiplinën kërcim së gjati.
