Kryeministri Edi Rama dhe kreu i Kuvendit, Ilir Meta kanë zhvilluar pasditen e së shtunës një takim pune në vilën 31 në Tiranë.
Në takimin i cili nisi rreth orës 13:00 dhe përfundoi rreth orës 15:00 më në fokus reformën në drejtësi, ishin të pranishëm edhe dy kryetarët e grupeve përkatëse politike PS-LSI, Gramoz Ruçi dhe Petrit Vasili si dhe Ministri i Drejtësisë Ylli Manjani.
Pas takimit, Rama dhe Meta thanë për mediat se diskutuan për finalizimin e reformës në drejtësi duke shfrytëzuar dhe rekomandimet e Venecias, si dhe një sërë çështjesh në prag të mbylljes së vitit 2015 dhe fillimin e një viti të ri.
Kryeministri Rama tha se, “një ndër objektivat kryesore është çuarja përpara e reformave në drejtësi. Ndamë kënaqësinë që trenit të reformës iu bashkua dhe Partia Demokratike. Jam i kënaqur se kaluan shumë kohë që të ndajnë trenin, por i hipën. Duhet të finalizojmë këtë proçes duke shfrytëzuar dhe rekomandimet e Venecias”.
Të gjithë së bashku, theksoi kreu i Qeverisë, të marrim përgjegjësinë që t’i japim vendit reformën e shumë pritur prej shumë vitesh.
Ndërsa kreu i Kuvendit, Ilir Meta duke vlerësuar punën e madhe që është bërë për të çuar përpara këtë proçes nga të gjithë aktorët politik, falenderoi ekspertët vendas dhe ndërkombëtarë për kontributin që kanë dhënë.
“Do të falenderoj dhe angazhimin e Komisionit të Venecias. Pasi rekomandimet e Komisionit të Venecias janë të rëndësishme. Fakti që të gjithë aktorët politikë, janë të kënaqur me vlerësimet e këtij komisioni, tregon që puna jonë për të ecur më shpejt për kurorëzimin e kësaj reforme në pranverë është plotësisht e realizueshme”, u shpreh ai.
Në këtë mënyrë, nënvizoi Meta, ne do të japim një përgjigje mjaft të rëndësishme dhe mjaft pozitive për gjithë qytetarët tanë, të cilët kërkojnë që vitin 2016 të jetojnë në një vend më të drejtë, më të sigurt dhe në një shtet sa më ligjor.
