Kryeministri Edi Rama shprehu sot bindjen se “spitali i ri kirurgjik në QSUT që do të çelet së shpejti do të vendosë një standard të ri shërbimi, si dhe do të shërbejë për të motivuar gjithë trupën dhe për të lehtësuar kalimin e dijes dhe eksperiencës më tej”.
Me rastin e fillimit të vitit të ri akademik, Rama ishte sot në ambientet e Universitetit të Mjekësisë.
Rama tha se shpejti do të çelet dhe spitali i ri modern i kirurgjisë ku një komponent i rëndësishëm do të jetë ndërveprimi me universitetin.
“Një sërë risish të tjera i takojnë vetë universitetit, por pa diskutim është shumë e rëndësishme që ndërveprimi dhe komunikimi mes nesh të vazhdojë përmes Ministrisë së Shëndetësisë që ka ndërmarrë një angazhim serioz dhe ka një plan të bashkërenduar me drejtuesit e universitetit për të kompletuar të gjithë elementët e logjistikës që i shërbejnë universitetit”, tha Rama.
Kryeministri shprehu falënderimin për të gjithë pedagogët e universitetit dhe për studentët që vazhdojnë mjekësinë, ndërsa garantoi se “ne do të bëjmë çmos që çdo ditë të bëjmë diçka më shumë që jeta juaj në kohën e studimeve të jetë më cilësore”.
/a.r
