Kryeministri Edi Rama ka reaguar në Facebook lidhur me akuzat e deputetes Albina Deda për fyerje karshi saj. Rama akuzohet se i ka thënë deputetes “fute në mitër”, për topin e letrës së laguer që ajo i hodhi. Në Facebook, Rama thotë se Deda po abuzohet nga partia e saj, pasi ajo e dëgjoi shumë mirë që ai i tha motër dhe jo monstër.
“Dhe pikërisht pse ata qëlluan me vezë (e jo zonja që kishte bërë një top me pako sheqeri të lagur), replika “gjinekologjike” nuk ishte për zonjën, po për burrat vezëlëshues!”, shkruan Rama.
“Keqardhje për zonjën deputete që abuzohet nga partia e saj, me pretendimin se e quajta monstër kur në fakt i thashë motër!
Këtë e dëgjuan të gjithë. E dëgjoi zonja e dëgjuan edhe burrat, që medemek u revoltuan nga humori im dhe qëlluan me vezë, a thua se vezët i pollën në sallë kur fola unë
Dhe pikërisht pse ata qëlluan me vezë (e jo zonja që kishte bërë një top me pako sheqeri të lagur), replika “gjinekologjike” nuk ishte për zonjën, po për burrat vezëlëshues!
Pasi bënë 24 orë të revoltuarit pa lidhje, kanë 24 orë që po bëjnë të fyerit pa lidhje. Të kesh në vend të opozitës qeverinë e vjetër, është fakt i trishtueshëm i jetës demokratike. Por të kesh përballë qeverinë e vjetër duke kaluar një ezaurim nervor, është edhe më keq. Eshtë e dhimbshme”, është statusi i kryeministrit në Facebook.
