“Komunikimi i javës” i kryeministrit Edi Rama i është kushtuar reformës në arsim dhe raportit të fundit të PISA-s për performancën e nxënësve të sistemit parauniversitar në Shqipëri. Kryeministri ka thënë se raporti në fjalë është një indikator mjaft i mirë që tregon se reforma në arsim ka sjellë rezultatet e saj të para në praktikën dhe nxënien e fëmijëve të sistemit parauniversitar.
Sipas Ramës rradhitja e Shqipërisë është ndër të parat për rritjen e pikëve në këtë sistem vlerësimi, pas dështimeve të njëpasnjëshme që kishte pësuar në vitet 2000, 2009 dhe 2012.
“Këtë javë morëm një lajm shumë ë mirë. Programi ndërkombëtar i vlerësimit të nxënësve PISA është një program i mirënjohur global…
Shqipëria kishte marrë pjesë në 3 edicione të viteve 2000, 2009 dhe 2012 dhe rezultatet ishin shumë të dobëta, sepse sistemi ynë arsimor parauniversitar nuk iu nënshtrua asnjë reforme serioze. Politizimi dhe korrupsioni goditën rëndë karrierën e mësuesit, tekstet shkollore degraduan dhe demotivimi i nxënësve u kthye në sistem. Sistemi parauniversitar u bë pre e ndryshimeve strukturore pa vizion. Të gjitha këto ngulmonin në një maturë shtetërore sa për të kaluar rradhën.
Këtë javë u shpall renditja, dhe vendi ynë u rendit jo në një pozicion të mirë, por duke lënë pas edhe plot 20 vende, që janë në shumë aspekte më të përparuara sesa i yni.
Nëse do të llogariteshin vetëm rezultatet e vajzave, Shqipëria do të rradhitej akoma më mirë… dihet, lum kush ka vajza! Në përdorimin e kompetencave shkencore kemi një rritje me 18 pikë. Këto kanë qenë fokusi i këtij edicioni dhe shqipëria është e katërta me rritjen më të madhe të pikëve. Në kompetencat matematikore, jemi në vendin e 3 për nga vendet me rritjen më të madhe të pikëve.“- tha Rama.
Kryeministri Rama i është referuar dhe postimit të javës së kaluar në “komunikimin e javës”, ku deklaronte se nuk është i kënaqur me arritjet, pavarësisht se shumëçka është bërë. Rama i është drejtuar disa mediave dhe opozitës, duke thënë se kur dikush në krye të qeverisë kritikon punën e tij, nuk duhet marrë për dobësi.
“Disa u hodhën përpjetë dhe e komentuan shprehjen time të pakënaqësisë së qeverisë, si një dobësi apo një dorëzim… por në fakt e kundërta është e vërtetë. Unë do jem dhe do të mbeten në detyre i pakënaqur, sepse pika ku unë dua të arrij kërkon akoma më shumë punë dhe mundime!
Askush të mos mendojë se kur unë rreshtoj arritjet, dua të nënkuptpj se jam ai kryeministri i kënaqur, por nuk është ashtu!”– tha Rama./java/a.k
