Kryeministri Edi Rama, në një intervistë për kanalin amerikan “Fox Business” me fokus konfliktin në Siri, shprehu mbështetjen e tij ndaj qëndrimit të mbajtur pak ditë më parë nga Presidenti Obama, mbi një bashkëpunim të mundshëm me Rusinë e Iranin për të luftuar terrorizmin.
I pyetur rreth regjimit të Bashar al-Assadit, kryeministri Rama tha se asnjë njeri me arsye të shëndoshë nuk mund t’i besojë Assadit dhe se, mbështetja e Putinit për të është një problem më shumë për Rusinë.
“Po, nuk është e lehtë dhe do duhet kohë, por besoj fort se Presidenti Obama kishte të drejtë kur tha se, përveçse zgjidhjeve ushtarake, kemi nevojë edhe për përpjekje të përbashkëta, duke përfshirë gjithashtu Rusinë dhe Iranin. Kjo është diçka që duhet qartësuar, por besoj se këto lloj përplasjesh në situata të tilla nuk është se përbejnë surprizë, përsa kohë nuk ka një veprim të koordinuar. Nuk mund të them se çfarë i tha Putini Presidentit, por besoj fort që Presidenti ka të drejtë kur thotë se duhet një veprim i koordinuar, sepse duket që pasojat janë shumë të rënda. Flukset e refugjatëve kanë shumë për të thënë rreth faktit se një radikalizim i mëtejshëm mund të godasë kudo dhe këdo”, ka deklaruar kryeministri Edi Rama.
Në përfundim të intervistës, kryeministri theksoi edhe njëherë, ashtu si në fjalën e tij në samitin kundër terrorizmit se, veç betejës ushtarake, për të mposhtur ideologjinë duhet të fitojmë betejën për mendjet dhe zemrat e brezave të ardhshëm, e në këtë aspekt Presidenti Obama është një pikë reference.
