Kryetari i Partisë Demokratike, Sali Berisha ka komentuar porosinë që kryeministri Edi Rama i la sot Drejtorit të ri të policisë së Shtetit, Muhamet Rrumbullaku, për të zbardhur të vërtetën mbi historinë e Ervis Martinajt.
Rama tha se është e paimagjinueshme, që policia nuk di t’i thotë sot publikut nëse personazhi më i errët i botës së krimit është gjallë apo vdekur dhe kërkoi që nëse gjendet i gjallë t’i dorëzohet drejtësisë.
“Nëse i kërkuari është vrarë t’i thuhet publikut që ky është vrarë. Nëse nuk është vrarë të gjendet, të kapet dhe t’i jepet drejtësisë”, u shpreh kryeministri.
Por, kreu i selisë blu ka një tjetër version për zhdukjen e të shumëkërkuarit të drejtësisë dhe e lidh me ligjin për lojërat e fatit, ku përfshin edhe vëllain e kreut të qeverisë, Olsi Rama.
“Sot Edi Rama porositi Muhamet Rrumbullakun për Ervis Martinajn. Ja u tregoj unë ku është Vis Martini. Martini është te lojërat e fatit. Shko pyet Olsin dhe ta thotë Olsi. Njerëzit e kanë të qartë si drita e diellit. Ai ishte njëshi i lojërave të fatit, i vëllai i tij është hija e tyre.
Sa ishte ai ishin ilegale, iku ai askush se di se ku iku, por dimë që lojërat u bënë të ligjshme tani. Gjithçka lëviz nga një trajektore që vjen nga kupola dhe shkon drejt poshtë“, tha Berisha.
