Kreu i qeverisë, Edi Rama, ka folur sot para garuesve për shkollën e policisë duke theksuar se e ardhmja e uniformave blu ka hyrë në rrugën e europianizimit.
Sipas Ramës, në pak kohë, Shqipëria ka një polivi të trajnuar ndërsa ai theksoi se institucioni i policisë ishte i degraduar nga politika dhe varfëria.
“Numri i aplikantëve në polici është rritur. Policia po bëhet institucioni që njerëzit besojnë. Ne e gjetëm me moshën mesatare më të lartë në rajon, 44 vjeç. Ne jemi të vendosur ta ulim këtë moshë mesatare të punonjësit të policisë dhe të rrisimi nivelin e arsimit mesatar të policit” – tha Rama.
Kryeministri tha se shqiptarët kanë sot një polici të respektuar dhe në rrugën e revolucionit dixhital.
Ndërkohë, kreu i qeverisë u ndal edhe në operacionin e Lazaratit duke e konsideruar atë si një sukses të madh dhe të vështirë.
Sipas tij, Lazarati nuk ishte thjeshtë një ngjarje e kultivimit të hashashit, por një bankë e parasë së zezë. Rama tha se Lazarati ishte aty prej vitesh, ndërsa sot autorët e mbjelljes së hashashit vijojnë të luftojnë përmes maskave të politikës.
“Shqipëria nuk do ta kishte marrë statusin e vendit kandidat pa i dhënë besimin së pari Brukselit se ne mund të bëjmë shtet. Këtë besim e forcoi në mënyrë të pazëvendësueshme puna e bërë nga policia e shtetit” – tha Rama.
