Shqipëria do të ketë një nga stadiumet më të bukur në Europë, sipas standardeve më të lartë. Ky është premtimi i kryeministrit Edi Rama gjatë prezantimit të projektit të stadiumit të ri të kombëtares, “Arena Kombëtare”, i cili do të ndërtohet në vend të stadiumit “Qemal Stafa”. Rama nuk e sheh të pamundur zhvillimin e ndeshjeve finale europiane, si ajo e Superkupës apo e Europa League në stadiumin e ri.
“Më në fund, edhe Shqipëria do të ketë një stadium të standardeve europiane, ku mund të zhvillohen deri finale të Superkupës së Evropës apo ajo e Europa League. Është plotësisht e mundshme, duke pasur një nga stadiumet më të bukur në Europë, pa e ekzagjeruar, me standardet më të lartë dhe me vizionin e duhur”, tha Rama.
Kryeministri tha se stadiumi i ri nuk do të jetë thjesht për zhvillimin e ndeshjeve të futbollit, por një qendër sociale e kryeqytetit.
“Stadiumi do të jetë një hapësirë e gjallë që do të funksionojë për të gjithë, jo vetëm për ndeshje. Do të jetë një qendër e jetës së kryeqytetit, me ndikim në jetën e saj”, tha Rama.
Kryeministri vlerësoi punën e bërë nga FSHF në dekadën e fundit, me rindërtimin e infrastrukturës.
“Të gjithë i mbajmë mend stadiumet si kanë qenë deri dhjetë vjet më parë, që vetëm stadiume nuk mund të quheshin dhe ku vetëm kulturë nuk mund të zhvillohej. Federata ka kthyer faqen e historisë së zhvillimit të futbollit, sepse ka ditur të vendosë prioritete, është përqendruar te infrastruktura, duke iu dhënë mundësi profesionistëve të rrisin nivelin e tyre”.
