Kryeministri Edi Rama ka reaguar përmes një postimi në platformën “X” pas protestës së zhvilluar sot në Vlorë kundër ndërtimit të muzeut hebraik, protestë e cila u shoqërua me tensione mes protestuesve dhe forcave të policisë.
Protestuesit tentuan të hynin në kantierin e muzeut, duke kundërshtuar projektin me pretendimin se punimet po zhvillohen në godinën historike të Klubit Patriotik “Labëria”.
Rama ka hedhur poshtë këto pretendime, duke iu referuar projektit të muzeut dhe sqarimeve të autoriteteve, sipas të cilave Muzeu Hebraik po ndërtohet në një godinë tjetër, një banesë e viteve 1850, pranë Muzeut Etnografik.
Në reagimin e tij, kryeministri ka kritikuar ashpër protestuesit dhe veçanërisht Bujar Leskajn, ndërsa ka theksuar se paralelisht me Muzeun Hebraik është parashikuar edhe rijetësimi i Muzeut “Labëria”.
“Një grup delenxhinjsh me në krye Lesko pijanikun kanë mësyrë sot në kantierin e Muzeut Hebraik të Vlorës – një gur themeli i kujtesës historike të qytetit të Pavarësisë e të lavdisë në mbrojtjen e hebrenjve gjatë Luftës së Dytë Botërore – me pretendimin pervers dhe shpifarak se medemek po u shkatërroka Muzeu Labëria ose ndryshe Muzeu Etnografik.
Çeta e Lesko Pijanikut e ka zakon këtë ritual sulmesh mbi kantieret e transformimit epokal të Vlorës, por populli vlonjat duhet ta dijë që me kërkesën time, Fondi Shqiptaro-Amerikan i Zhvillimit ka akorduar 200 mije USD per hartimin e projektit të Rilindjes së Muzeut Labëria, një karakatinë e degraduar totalisht që do të kthehet krahas Muzeut Hebraik në një tjetër derë të hapur krenarie të Vlorës patriotike e turistike.
Dhe Lesko Pijaniku do vrapojë tek kantieret e radhës, njësoj siç vrapon përnatë pas kecave e pulave që shoqërojnë rrëketë e rakisë në gurmazin e pangopur të tij”, shkruan Rama.
