Një makinë e djegur u gjet mëngjesin e së shtunës në zonën e Volvës, rreth një orë larg Serresit në Greqi, dhe dyshohet se është automjeti i dytë i përdorur nga bashkëpunëtorët e të burgosurit shqiptar, Gentian Cipi, i cili u arratis mbrëmjen e djeshme nga spitali i Serresit.
Mjeti u pikas nga një kalimtar në orët e para të mëngjesit. Ai njoftoi zjarrfikësit, të cilët bënë të mundur shuarjen e flakëve. Vendndodhja e tij konsiderohet kritike për hetimin, pasi mund t’u ofrojë autoriteteve informacion në lidhje me rrugën që ndoqën autorët e krimit pas arratisjes së tyre.
41-vjeçari shqiptar u arratis pasi persona të armatosur, të maskuar dhe të veshur si efektivë policie, sulmuan eskortën e burgut në ambientet e jashtme të spitalit të Serres. Ata kërcënuan me armë punonjësit e ruajtjes së jashtme, i çarmatosën dhe morën me vete të dënuarin.
E SHKUARA KRIMINALE
Çipi rezulton një person me precendet të rëndë penalë në Shqipëri e në Greqi. Konkretisht ai rezulton i dënuar në Shqipëri në korrik 2024 me 2 vjet burgim për “shkatërrim i pronës me zjarr” e kryer në bashkëpunim dhe në rrethana rënduese. Fillimisht ai ishte hetuar në masën “Arrest në burg” por më pas Gjykata e kishte zbutur masën në “Ndalimi i daljes jashtë shtetit” dhe “Garancia pasurore”.
Ai është akuzuar për djegien e një automjeti në 24.04.2023, në lagjen 13, Rr. “Loni Grazhdani” në Korçë.
Më herët, në janar 2023, në kuadër të operacionit “Fijet”, policia procedoi Gentian Cipin për shkak se gjeti të vendosura kamera në mënyrë të paligjshme pranë banesës së tij.
Në 3 shtator 2024, Gentian Çipi hapi zjarr në Pylaia të Selanikut, duke tentuar të vrasë një 25-vjecar grek jashtë një kantine. Greku u plagos me 3 plumba por arriti t’i mbijetojë plagëve, ndërsa Cipi arriti të arratisej.
