Fieri ishte ndalesa e radhës e Aleancës për Shqipërinë Evropiane në turin e saj të preznatimit të kandidatëve për zgjedhjet vendore. Në fjalën e tij kryeministri Edi Rama premtoi vijimin e reformë administrativo-territoriale me zgjerimin e kompetencave për kryetarët dhe këshillët e bashkive të reja.
Duke u ndalur tek kundërshtarët e PD, Rama tha se fushata e opozitës është më e trishtueshmja pasi sipas tij kjo parti po i tregon përralla nga e kaluara qytetarëve.
“Ju e shihni këtë fushatë në dy pamjet e veta. Njëra është e fushatës sonë ndërsa pamja tjetër është pamja e trishtueshme e fushatës së PD-së, e cila këmbëngul të vazhdojë të tregojë përrallë nga e kaluara që shqiptarët e ndëshkuan me 1 milion vota në 23 qershor 2013, dhe ka dal në Shqipëri duke kërkuar budallenj që t’i bind se në 21 qershor është vota për të pasur taksat më të ulëta në botë për t’i marrë dritat thuajse qyl”, u shpreh Rama.
Më tej kryeministri tha se kandidati Armando Subashi ka një program dhe vizion për Fierin, për të cilin do të gjejë mbështetjen e vazhdueshme të qeverisë.
“Asnjë shkollë nuk u mbyll se erdhi kryeministri këtu! Asnjë listë me mësues nuk u hartua se erdhi kryeministri këtu”, tha Rama.
Ai u ndal edhe tek ndarja e re territoriale, që sipas tij, i jep një mundësi historike fshatit.
“Asnjëherë fshati nuk ka pasur mundësinë që i jep reforma jonë historike, ku për herë të parë fermerët do të kenë pranë mbështetjen, që nuk e kanë pasur kurrë, përmes bashkive të reja dhe kryetarëve të bashkive. Jemi të vendosur që reformën ta çojmë më tutje, që të japim shumë më tepër pushtet për bashkitë dhe kryetarët e bashkive, të ndajmë përgjegjësitë dhe detyrat mes nesh që të zgjedhurit tuaj vendorë, të jenë të rëndësishëm që të kenë mundësi të bëjnë ato detyra”, tha Rama.
Sakaq në fjalën e tij, edhe kreu i LSI Ilir Meta kërkoi një pjesëmarrje masive më 21 qershor.
“Ndërsa të tjerët shpifin e shajnë, ne propozojmë zgjidhje dhe mundësitë më të mira për familjet e Fierit. Këtu e vetmja fjalë, dhe që nuk ka nevojë të thuhet, është fjala “fitore”, ndaj unë po e mbyll duke uruar një fitore të thellë dhe të jashtëzakonshme që do të vijë përmes një pjesëmarrjeje të gjerë dhe të jashtëzakonshme”, tha kreu i LSI-së.
