Kryeministri Edi Rama nga foltorja e Kuvendit u është kundërpërgjigjur ashpër qëndrimeve të djeshme të opozitës, që solli edhe shtyrjen e seancës për ditën e sotme.
Ai theksoi se opozita sërish e përfshiu qeverinë në një krismë me daulle, ndërsa nuk kurseu as ironitë.
“Jemi ftuar sot në një diskutim, që vetëm diskutim nuk ka shans të jetë. Javën e shkuar u mor peng kjo foltore për me demek ndalimin e kryetar për këtë diskutim. Ndërkohë sipas rregullores së Kuvendit, nuk ishte kërkuar një diskutim i tillë. Sot diskutimi është në rend të ditës pasi u kërkua sipas rregullores. Në fakt që dje ju formalisht ju jeni në rregull me normat e shkruara, me këtë sallë, duke bllokuar foltoren dhe duke u çjerre për mungesën e lirisë dhe ne jemi këtu të kyçur në kornizën e kërkesës suaj. Faktikisht ju nuk e bëni dot një diskutim në kuptim që ka kjo fjalë për qytetërimin demokratik.
Jeni bërë shëmbëlltyra e asaj shprehjes së famshme; kush nuk di ta përdor lirinë e fjalës, ankohet për mungesën e saj. Sa më të pafate janë politikanët në kushtet e lirisë për ta përdorur lirinë e faljes, aq më shumë çicrrën se u mungon liria. Na përfshitë në një krismë me daulle, në çadrën e vjetër të baltës. Jeni bosh lartë, e bosh poshtë”, tha Rama.
Kreu i PS vijoi kritikat e tij edhe sa i përket përplasjeve në Kuvend. Ai e quajti Partinë Demokratike një gjysma-gjel ndërsa tha se panorama e opozitës bëhet “bir o Lul vëllai kë të qaj më parë…”
“I latë 200 mijë pupla rrugës e vini këtu bëni trimin dhe ngrini volumin” – tha kryeministri në Kuvend.
Rama nuk kurseu as sulmet ndaj LSI-së ndërsa tha se “u nis të bëhej e para e papara, dhe vajti i ra murit me kokë”.
“Edhe miku im Lulzim Basha pasi bëri akt liderdshipi me 18 maj e mohoi se u tremb, nga frëngjitë e Jozefinës dhe Patozit nga kryengritja në pallat, nga ofiqarët e SHQUP-it që humbën karriget, dhe u kthye te cadra e dasmave. E mohoi dhe ca bëri ripohoi politikën qorrë, shurdhe, memece që për katër vite ju katandisi juve në gjysmagjel. Edhe LSI, që qetësine dhe dashurinë e ktheu në llapazanëri dhe vajmedetërinë e linjës së re. Bir o Lul vllai kë të qaj më parë ty a motrën tonë që keni një hall”- tha Rama.
/b.d
