“Nuk kam pse të jap dorëheqjen. Do të vazhdojmë punën tonë”. Kështu deklaroi kryeministri Edi Rama – vetëm pak orë pasi Këshilli Europian vendosi të mos hapë negociatat për anëtarësim me Shqipërinë – dhe duket se këtë po bën.
Rama do të rinisë nga nesër ecejaket diplomatike, duke u takuar me një sërë personalitetesh të lartë të politikës në Europë.
Udhëtimi i tij nis drejt Athinës ku do të marrë pjesë në Forumin e vendeve të Ligës Arabe.
Në orën 13:30 me kohën vendase, Rama do të takohet me kryeministrin e Greqisë, Qiriako Micotaqi, takim që pritet të zgjasë rreth një orë e ku do të diskutohet për çështje të rëndësishme.
Ndër to edhe marrëveshjet e lëna “pezull” mes dy vendeve si ajo e kufirit detar.
Mbrëmja kryeministrin Rama do ta gjejë në Bruksel. Federica Mogerini ka thirrur sërish në darkë liderat e Ballkanit Perëndimor.
Çështja e vazhdimit të dialogut midis Kosovës dhe Serbisë do të jetë në fokus të diskutimeve.
Lista e të ftuarve në darkën ku do të jetë i pranishëm edhe presidenti i KE-së Jean Claude Juncker përfshin edhe Zoran Zaevin e Maqedonisë së Veriut, Milo Gjukanoviçin e Malit të Zi, Aleksandër Vuçic për Serbinë, Hashim Thaçi për Kosovën dhe 3 përfaqësuesit e Bosnje-Hercegovinës Milorad Dodik, Zeljko Komsiç dhe Shek Xhaferoviç.
