Edi Rama, kryeministri i vendit është i ftuar në SHQIP në Top Channel. Rama i pyetur mbi letrën e Blushit sot dhe për shkrimin e pak ditëve më pare, tha se nuk komenton komentet dhe se është i përqëndruar në Rilindjen e vendit.
Sipas Ramës, rruga që po ndjek Shqipëria është e duhura dhe se gjithçka shkon sipas parashikimeve. Kryeministri hodhi poshtë akuzat për papunësinë në rritje duke thënë se është fakt që ka shumë të papunë, por në 1 vit qeveria e tij ka arritur të hapë 83 mijë vende të reja pune.
Rama theksoi se në të gjitha ministritë puna ka qenë galopante dhe se zotimet e 2013 po mbahen dhe se përkushtimi do të jetë maksimal. Mbi 10 mijë legalizime falas në vetëm 1 vit, shëndetësi që nuk mungojnë më ilaçe dhe ku infrastruktura po përmirësohet, ishin disa nga ato premtime të mbajtura që Rama tha ndër të tjera.
I pyetur se pse Veliaj dhe jo Majko, Klosi, etj për Tiranën, Rama tha se Majko ska qenë kurrë në planet për bashkinë e Tiranës, ndërkohë që Veliaj është energjia, punëmbaruari dhe individi që ka mbështetjen e qytetarëve dhe koalicionit.
